Әкімшілік айыппұлды өндіріп алуды ұтымды ұйымдастыру тапсырылды – ШҚО
Фото: gov.kz
Облыста қылмыс көрсеткіші 26% төмендеген. Дәлірек айтқанда, 2022 жылдың 1 жартыжылдығында 3 494 оқиға тіркелген, ал биылғы осындай кезеңде 2 580 дерек тіркелген.
Есірткіге қатысты қылмыстың алдын алуда өзекті мәселеге айналған Telegram-канал арқылы тарайтын синтетикалық есірткілердің қолжетімділігі талқыланды, деп хабарлайды Altaynews тілшісі.
ШҚО прокуратурасының дерегінше, биыл кісі өлтіру саны – 37%, денсаулыққа ауыр зиян келтіру фактілері – 29%, ұрлық – 18%, тонау – 28%, шабуыл жасау – 54%, бұзақылық – 68%, қоғамдық орындардағы қылмыстар саны – 25%, мас күйде істелген қылмыстар – 13%, отбасылық-тұрмыстық қатынастар саласындағы деректер – 23%, рецидивтік қылмыс 19% төмендеген.
Бұл деректер Үйлестіру кеңесінің отырысында айтылған. Отырыста есірткінің заңсыз айналымына, алаяқтыққа, кәмелетке толмағандарға қатысты қылмыстарға қарсы қабылданатын іс-қимыл мәселелеріне ерекше назар аударылған.
Есірткіге қатысты қылмыстардың алдын алуда өзекті мәселеге айналған телеграм-канал арқылы таратылатын синтетикалық есірткілердің қолжетімділігі және интернет-алаяқтықтың алдын алумен байланысты проблемалар талқыланды.
Соңғы 3 жылда облыс аумағында әкімшілік практикада айыппұл салу туралы 760 мың қаулы шыққан, жалпы сома – 13,8 млрд теңге. Осы кезеңде бюджетке 10,7 млрд теңге немесе айыппұлдың 70%-ы түсті. Сонымен қатар айыппұлдың 30%-ы орындалмай қалады.
Жағдайды түзету үшін уәкілетті органдарға әкімшілік айыппұлдарды өндіріп алу жөніндегі жұмысты ұтымды ұйымдастыруға бағытталған шаралар кешенін қабылдау міндеттелді.