Төр Алтайдың төсінде өтіп жатқан фестивальдің көркемдігі жайлы осыған дейінгі мақалаларымызда тоқталып өттік. Десе де, бюджет есебінсіз, кәсіпкерлердің арқасында ұйымдастырылып жатқан ауқымы кең, аясы зор шараның қызықты деректерімен бөліскенді жөн санаймыз, деп хабарлайды  Altainews.kz тілшісі. 

Фестивальмен қатар облыстың барлық шабармандары мен жүйріктерінің басын қосып жатқан XXIII халықтық ойындар өтіп жатыр. Бұл шараны өткізу үшін аудан орталығындағы ипподром толықтай жаңартылған. Бұл атшабар орын осыған дейін тозып, халі өте мүшкіл жағдайға жеткен. Ипподром алаңын жөндеуге аудан тұрғындары түбегейлі кіріскен. Алаңнан сегіз жүк көлігіне шақ келетін тас шығарылып, беткі қабаты толықтай сүріліп, жұмсақ жабын жайылған. 

Дайындық жұмыстар тек аудан орталығында ғана емес, Катонқарағай ауылдық округінде де жүргізілген. Республикалық маңызы бар тас жол бойындағы аялдамалар жаңартылып, қоршаулар қойылған. Катонқарағай ауылының эстетикалық келбетін жақсарту мақсатында «Катонқарағай ауданын тұрақты дамыту қорымен» бірге дизайн коды жасалған. Мұнда әрбір салынатын, не жөндеу көретін ғимарат бірегей дизайнмен жобаланады. Қазіргі аудан әкімдігі, прокуратура, полиция, сот ғимараттары жаңа дизайн үлгісінде үйлестірілген. Бұдан бөлек кәсіпкерлер демалыс орындары, қонақ күтетін орындар, дүкендер мен мейрамханалардың қасбетін бірегей стильмен жасауды қолға алған. 

Әрбір ауылдық округ жанында аялдамалар бар. Ауылдың эстетикалық келбетін жақсартып, мал кірмеу үшін қоршаулар ұйымдастырылды. Кәсіпкерлер алдағы жылдары да тұрақты даму жобаларын қолдауды жалғастырады. Жергілікті халықтың өз аудандарын дамытуда көтерген бастамаларын қолдай бермек, – дейді қор жетекшісі Серік Жүнісов. 

Айта кету керек, фестиваль аясында қонақтардың ыңғайлы, еркін қозғалысы үшін барлық дүкендерге арнайы QR-кодтар қойылды. Оны сканерлей отырып туристік маршруттар туралы ақпарат алуға болады. 

Бұдан бөлек фестиваль өтетін аумақта облыс аудандары 20 киіз үйден тұратын көрме аймағын, 17 киіз үйден тұратын тамақтану және демалыс аймағын, сондай-ақ 21 шатыр-кэмпингтен тұратын арнайы қонақжай кеңістікті ұйымдастырды. Бұл алаңда 7 баған орнатылып, жарықтандырылды, тазалық орындары қойылды, әрбір киіз үйге жарық тартылды, сонымен қатар іс-шара аумағына су тартылды.

Фото: Жібек Нұрахмет