28 сәуір күні облыстағы ауыл мектептерінің 6-сынып оқушылары арасында ұйымдастырылған «Мың бала» ұлттық зияткерлік олимпиадасы тәмамдалды. Жарыс «EL UMITI» бастамасын іске асыру шеңберінде ұйымдастырылған.

Олимпиада жеңімпаздары облыстық және республикалық дарынды балаларға арналған мамандандырылған мектептерде оқуға өтінім бере алады. Өтінім қабылдау қатысушының жеке кабинеті арқылы жүзеге асырылып, 30 мамырға дейін жалғасады, деп хабарлайды Altaynews тілшісі.

Олимпиада ауылдық жерлердегі мектеп оқушыларының дарыны мен қабілетін шыңдау және балаларға қолдау көрсету, қажетті жағдай жасау мақсатында іске асырылған.

«Мың бала» байқауы 1 наурызда басталып, бірнеше кезең бойынша өткізілді. Қатысушылар онлайн-платформа арқылы тіркеліп, бірінші кезеңде компьютерлік тестілеуден өтті. ШҚО бойынша олимпиадаға 2409 оқушы тіркелген.

Облыс бойынша І кезеңнен өткен 170 оқушы ІІ кезең сынақтарын 28 сәуір күні U-Study тестілеу орталықтарының базасында орындаған.

Олимпиада математикалық сауаттылық, қазақ тілі, орыс тілі, ағылшын тілі, жаратылыстану пәндері бойынша академиялық қабілетті анықтауға бағытталған.

Қорытынды бойынша облыста 28 жеңімпаз анықталып, олардың аты республиканың 1000 үздік оқушысының тізіміне енді.