Өскеменде автослесар мамандығы бойынша білім алып жатқан студенттер ескі велосипедтерді жөндеп, балаларға сыйға тартады, деп хабарлайды Алтайньюс тілшісі.

«Біз, студент-автослесарлар, Өскеменде «Велодобро» марафонын жариялаймыз. Баршаңызды қатысуға шақырамыз! Егер сіздің үйіңізде ескі велосипед бар болса, бізге әкеліңіз. Біз оны толық техникалық байқаудан өткізіп, жөндеп, аз қамтылған отбасынан шыққан балаларға сыйлаймыз. Алда жаз. Балақайлардың каникулды жақсы өткізуіне көмектесейік».
Өскемен құрылыс колледжінің студенттері ғаламторда осындай хабарландыру таратты.

Қала тұрғындары бұл ұсынысқа оң көзқарас танытуда. Үйлеріндегі ескі велосипедтерін студент-автослесарлардың қолдарына тапсыруға дайын.

Балалардың болашақ базарлығы Өскемендегі Шәкәрім, 79 мекен-жайында қабылданады.

Ақпаратты 8 777 765 27 69, нөмірі бойынша нақтылауға болады.