Қиялындағы велосипедіне қол жеткізе алмай жүрген өскемендік 12 баланың жазғы каникулда армандары орындалды, деп хабарлайды Алтайньюс тілшісі.

Жоқшылық қолбайлау болып отырған қаншама жанұя бар. Ал «ноқта-жүгені сыпырылып» оқудан босаған кез келген ойын баласының жаздағы арманы әрине – велосипед. Өскеменнің автолесарь-студенттері осы армандарды орындауға кірісіп кетіпті.

Қалай дейсіз ғой?

Біреудің гаражында, біреудің қорасында немесе балконында ешкімге керексіз жатқан ескі великтер бар ғой. Міне осындай темір-терсекке  Өскеменнің болашақ автошеберлері жан бітіреді.

Жоба авторы Владимир Столбовскийдің айтуынша, әлеуметтік желі арқылы үндеу жарияланған соң, ескі велосипедтерін арқалап келгендер көп болыпты.

-Оның ішінде 40 жыл бұрынғы раритеттер де бар. Бірінің бөлшегін біріне салып, жетпегенін сатып алып 12 велоспед құрап-жөндеп шығардық. Барлық велосипедтер халықты әлеуметтік қорғау мамандарының көмегі арқылы мұқтаж балаларға берілді,-дейді ол.

Жігіттер жаз кезінде тағы да ескі велосипедттер жеткізілсе дейді. Себебі армандаған великтерін күтіп отырған балалардың саны өте көп.  

Үйіңізде ескі велосипед болса, мына мекенжайға әкеліп тапсыруға болады: Шәкәрім көшесі – 79.  Тел.8 777 765 27 69