Қазақстан Әділет министрлігі нотариаттық сенімхаттарды онлайн ресімдеу бойынша сервисті іске қосты.

Алғашқы екі күнде Қазақстанда осындай 60-тан астам құжат ресімделді. Мұның бәрі – смартфон және оған орнатылған eGov Mobile қосымшасы арқылы іске асырылады, деп хабарлайды Altaynews.kz тілшісі Zakon.kz-ке сілтеме жасай отырып.

Биыл Қазақстанда 66 цифрлық бастаманың пулын іске асыру көзделген, оның 41-і азаматтарға қолжетімді.

Өз кезегінде Экология министрлігі аңшы куәлігін цифрландырды. 1 қаңтардан бастап мұндай құжатты рәсімдеуді жоспарлаған әрбір адам оны енді тек электронды түрде алуға болатындығын білуі тиіс. Жаңашылдық бұрынғыдай қағаз нұсқасын алып жүру қажеттілігін жояды. Сонымен қатар қатты мұқабалы аңшы куәлігін жасау үшін 3 АЕК көлемінде ақша төлеудің де қажеті жоқ.

Қазақстан – нотариаттық қызметтің осы түрін цифрлық форматқа ауыстырған әлемдегі алғашқы мемлекеттердің бірі. Бүгінгі таңда онлайн режимде тек Франция мен Литвада ғана сенімхатты нотариалды куәландыруға болады. 

ҚР әділет министрі Азамат Есқараев жобаны Мемлекет басшысының тапсырмасы бойынша Үкіметтің «цифрлық» бастамалары аясында (сондай-ақ Digital Justice жобалар портфелі шеңберінде) Әділет, Цифрлық даму, инновациялар және аэроғарыш өнеркәсібі министрліктері Республикалық нотариаттық палатамен бірлесіп іске қосқанын атап өтті. 

Еске салайық, 11 сәуірде еліміздің әділет министрі Азамат Есқараев сенімхатты онлайн ресімдеу мүмкіндігі бар е-нотариат пилоттық жобасын іске қосу республикадағы нотариустардың табысына ешқандай әсер етпейтінін айтқан болатын.