Ұлан ауданында қатерлі ісікті ерте анықтау көрсеткіші  артып келеді. Тіркелген обыр диагнозының  35 пайызы ерте сатысында анықталып отыр. Тұрғындардың басым бөлігі жатыр мойны қатерлі ісігі мен сүт безі қатерлі ісігін ертерек анықтауға арналған скринингтен өткен. 

Дегенмен мамандар колоректальды қатерлі ісігі скринингін жүргізу бойынша жұмысты ширата түсу керектігін айтады, деп хабарлайды Altainews.kz тілшісі.

Естеріңізге сала кетейік, ШҚО көпсалалы онкология және хирургия орталығының мамандары Ұлан ауданында онкологиялық қызметтің жай-күйіне мониторинг жүргізген болатын.

Орталықтың мониторинг және бағалау тобы қатерлі ісіктердің ерте диагностикасын жақсарту мақсатында тұрақты негізде МСАК ұйымдарына консультациялық және практикалық көмек көрсететінін айта кеткен жөн. Сапар барысында мамандар тексеру кабинеттерінің жұмысын және онкоскринингтер өткізу сапасын талдап, «Жасыл дәліз» жүйесінің қалай іске асырылып жатқанын тексерді, онкологиялық сақтық  мәселесі бойынша МСАК мамандарына оқыту жүргізді, сондай-ақ пациенттерді қабылдады.

2024 жылдың үш айында ауданда қатерлі ісіктердің 24 жаңа жағдайы тіркелген. 426 науқас диспансерлік есепте тұр. Ауру құрылымында бірінші орынды өкпе қатерлі ісігі, екінші орынды ұйқы безі қатерлі ісігі, үшінші орынды сүт безі қатерлі ісігі алады.