ШҚО көпсалалы онкология және хирургия орталығының мамандары онкологиялық қызметтің жай-күйіне мониторинг жүргізу және бағалау мақсатында  Риддерге барды.  Сапар барысында    орта буын медицина қызметкерлерінің, сондай-ақ дәрігерлердің, атап айтқанда бейінді мамандар мен терапевттердің тапшылығы анықталды, деп хабарлайды Altainews.kz тілшісі.

Мониторинг және бағалау тобы қатерлі ісіктердің ерте диагностикасын жақсарту мақсатында тұрақты негізде МСАК ұйымдарына консультациялық және практикалық көмек көрсетеді. Сапар барысында мамандар тексеру кабинеттерінің жұмысын және онкоскринингтер өткізу сапасын талдап, «Жасыл дәліз» жүйесінің қалай іске асырылып жатқанын тексерді, онконастрия мәселесі бойынша МСАК мамандарына оқыту жүргізді, сондай-ақ пациенттерді тексерді.

Мониторинг барысында онкологиялық орталықтың мамандары тіркеу бөлімі қызметкерлері мен  тексеру кабинеттерінің фельдшерлері және терапевттер арасында өзара іс-қимыл дұрыс реттелмегендігін атап өтті. Нәтижесінде кейбір пациенттер дәрігерге тексеру кабинетін айналып өтіп барады, соның кесірінен көзбен қолжетімді локализацияларда онкопатологиялардың бар-жоғына тексерілмейді.  Сондай-ақ орта буын медицина қызметкерлерінің, бейінді мамандар мен терапевттердің тапшылығы анықталды.