Өскемен гарнизонында азаматтардың әскери даярлығы пысықталып жатыр. Бұл жолы оқу-жаттығуға Алтай ауданынан 70 адам келді, деп хабарлайды Altainews.kz тілшісі.

Өскемен гарнизонының 27943 әскери бөлімінің полигонында өтіп жатқан әскери жиын он күнге созылады. Басты мақсат – әскери міндеттілердің жауынгерлік даярлығын арттыру.

– Жауынгерлік даярлық жоспары негізінде Алтай ауданың әскери міндеттілері үшін оқу-жаттығу жиындарын өткізіп жатырмыз. Азаматтар полигондағы шатырлы қалашыққа орналасты. Жиынға қатысушылар жергілікті органдардың қаражаты есебінен тамақ және заттай мүлікпен қамтамасыз етіледі,» - деді ШҚО аумақтық қорғаныс бригадасының командирі Мейрам Сейлғазинов.

Жиынға шақырылған азаматтар бұған дейін әскери борышын өтеген.

– Он күн ішінде мерзімді әскери қызметте үйренгенімізді қайталап, еске түсіреміз. Киім-кешек және керек-жарақ заттарды алдық, – деді алтайлық азамат Дархан Заманбеков.

Әскери қайта даярлау жиыны бірнеше кезеңнен тұрады. Оқу соныңда бағдарламаны сәтті аяқтаған азаматтарға әскери атақ беріледі.