Катонқарағай өңірінің тумасы, 1950-1960 жылдары есімі елге кеңінен танылған, Қазақ КСР-ның 7 дүркін және Орта Азия мен Қазақстанның 2 дүркін чемпионы, Ұлттық қазақша күрес түрінен  тұңғыш «Қазақ КСР-нің спорт шебері» атағын алған палуан туралы кітап оқырманға жол тартты, деп хабарлайды Altainews.kz тілшісі.

Облыс орталығындағы Пушкин атындағы кітапхана төрінде үздік төреші, тау мінезді, нар тұлғалы қазақ палуаны, жерлесіміз  Қылаң Бақыжановтың спорт және еңбек жолын баяндайтын «Қазақ күресінің саңлағы» атты кітаптың тұсаукесері өтті.

Ал бұл жолы қалың қауымға жол тартқан бұл кітап қазақтың біртуар тұлғасының көпшілік біле бермейтін тұстарын кеңірек баяндайды. Облысымыздың бас кітапханасында өткен тұсаукесерге палуанның алыс-жақыннан келген туыс-туғандары мен зиялы қауым балуанның бозкілемдегі ерліктері мен адами қасиеттері жайлы өте тамаша естеліктерді айта отырып, кітаптың авторына да ерекше алғыстарын  білдірді. Өйткені қағаз бетіне түскен әрбір құнды дүниенің уақыт өткен сайын маңыздылығы арта беретіні сөзсіз. Ендігі кезекте бұл құнды еңбектің тұсау кесер рәсімі палуанның туған жері киелі Шыңғыстай өлкесінде жалғасын таппақ.