ШҚО-да фармацевтикалық қызметпен заңсыз айналысқандар ұсталды
шартты сурет: depositphotos.com
Шығыс Қазақстан облысының полициясы өңірде заңсыз фармацевтикалық қызметтің екі фактісін әшкереледі. Нәтижесінде 66 тонна прекурсор айналымы шектелді. Аталған фактілердің барлығы есірткі құралдары, психотроптық заттар мен прекурсорлардың заңды айналымы саласындағы құқық бұзушылықтарды анықтауға бағытталған «Дәрмек» жедел профилактикалық іс-шарасының барысында тіркелді, деп хабарлайды Altainews.kz тілшісі.
Жедел профилактикалық шара барысында тәртіп сақшылары құрамында есірткі және психотроптық заттар бар дәрілік заттарды рецептсіз беру фактілеріне, сондай-ақ олармен жұмыс жасау ережелерін бұзуға ерекше назар аударды.
Бес күн ішінде полиция қызметкерлері аталған заттарды өз қызметінде пайдаланатын 17 дәріхананы, 6 емдеу мекемесін, 8 кәсіпорын мен ұйымды тексерді.
«Құқық қорғау органдары тоғыз әкімшілік құқық бұзушылықты тіркеді, оның ішінде екі медицина қызметкері әкімшілік жауапкершілікке тартылды. Олар есірткі заттарын сақтауда бұзушылықтарға жол берген, оның үстіне олардың фармацевтикалық қызметпен айналысуға лицензиялары жоқ. Есірткі және психотроптық заттардың 700-ден астам таблеткалары мен ампулалары тәркіленді», - деді облыстық полиция департаментінде.
Бұдан басқа, полиция қызметкерлері «Өскемен-Алматы» тасжолында белгіленген ережелерді бұза отырып, 66 тоннадан астам прекурсорларды тасымалдаған жүк көлігін тоқтатты. Қазір жауапты тұлғаға қатысты шаралар қабылданып, химиялық элементтердің тасымалдануы бұзушылықтар жойылғанға дейін шектелді.