Тәртіп сақшылары ШҚО ҰҚКД-мен және арнайы мақсаттағы жасақпен бірлесіп, 2,5 тоннадан астам жабайы қарасора өртеді.

«Қарасора-2023» іс-шарасының барысында құрамында есірткі заты бар өсімдіктерді заңсыз өсіру дерегін анықтау мақсатында мамандар облыс аумағын тікұшақпен барлады, деп хабарлайды Altaynews тілшісі.

Сонымен қатар, «Қарасора-2023» құрамында есірткі заты бар өсімдіктер өздігінен өсетін орындарды анықтауға бағытталған.

Шара барысында Зайсан ауданында «қарасора» тұқымдас өсімдігінің плантациясы жойылды. Ұзындығы 5 шақырымнан асатын плантациядағы өсімдік қаулап өсіп, биіктігі адам бойымен бірдей болған көрінеді.

ШҚО ПД дерегінше, аталған өсімдіктен «марихуана» және «гашиш» сынды есірткі түрлері алынады.

Жыл басынан бері 90-нан астам есірткі қылмысы мен құқық бұзушылық анықталған. Оның ішінде, тыйым салынған өсімдіктерді өсіру бойынша 11 дерек анықталған. Биыл заңсыз айналымнан 250 кг-дан астам есірткі тәркіленді, оның 5,5 килограмы – синтетикалық зат.