Оқу-ағарту министрлігі «Үздік педагог» байқауына қатысуға өтінім қабылдау басталғанын мәлімдеді. Байқауға қатысуы үшін «Үздік ұстаз» сайтында тіркелу қажет, деп хабарлайды Altaynews тілшісі.

«Үздік педагог» республикалық  байқауы 2012 жылдан бері өткізіліп келеді. Бұған кемінде бес жыл үздіксіз педагогикалық өтілі бар педагогтар қатыса алады. Сондай-ақ мектепке дейінгі, орта, техникалық және кәсіптік білім беру ұйымдарының штаттағы педагогтары де бақтарын сынай алады.

Байқаудың барлық кезеңі, нақтырақ айтқанда, қатысушыларды тіркеуден бастап республикалық кезеңнің қорытындысын шығаруға дейін толығымен цифрландырылғанын айта кеткен жөн.

Жеңімпаздарға 3 млн теңге көлемінде сыйақы табысталады. Биылдан бастап байқауға жекеменшік мектеп педагогтары де қатыса алады.

Байқау үш кезеңнен тұрады:

• I кезең – аудандық, қалалық деңгей;
• II кезең – облыстық деңгей;
• III кезең – республикалық деңгей.

Екі кезең қорытындысы бойынша ең жоғары балл жинаған мұғалімдер республикалық деңгейге өтеді.