Жерлестеріміз Алматы қаласында өткен бокстан Халық қаһарманы Сағадат Нұрмағанбетовты еске алуға арналған турнирден олжалы оралды.

Сегіз күнге созылған халықаралық жарысқа қазақстандық былғары қолғап шеберлерімен қатар, Қырғызстан, Моңғолия, Ресей, Тәжікстан, Өзбекстан сияқты алыс-жақын шетелден келген боксшылар қатысып, 10 салмақ бойынша өзара мықтыны анықтады. Қорғаныс министрлігінің баспасөз қызметі хабарланғандай, биылғы додада барлығы 100-ге жуық спортшы қатысыпты. Олардың арасында біздің облыстан барған бес боксшы болды.
Турнир қорытындысы бойынша сол жерлестеріміздің екеуі жүлделі орындардан көрінді. Атап айтсақ, 60 келіге дейінгі салмақта сынға түскен Бекнұр Ожанов жарыс жеңімпазы атанса, 64 келіде жұдырықтасқан Ілияс Мирхатұлы үшінші орынға ие болды.

Осы ретте дода жүлдегерлері атанған жерлестеріміз облыстық жоғары спорт шеберлігі мектебінің өкілдері екенін атап өткеніміз орынды.