А.С. Пушкин атындағы Шығыс Қазақстан облыстық кітапханасында Мемлекет және қоғам қайраткері, Қазақстанның еңбек сіңірген қайраткері, ҚР Парламенті Мәжілісінің бірінші шақырылымының депутаты, қазақ тілінде тұңғыш жазылған заңның авторы, Халықаралық журналистер, Қазақстан Жазушылар, Композиторлар Одақтарының мүшесі Әкім Ысқақпен кездесу өтті, деп хабарлайды Altainews.kz тілшісі.

Әкім Ысқақ ақын, жазушы, журналист, сазгер, сатирик ретінде республика жұртшылығына аты мәлім, қаламы қарымды қаламгер. Түрлі жанрдағы отыздан астам кітаптың авторы, елге танымал «Көңіл қымбат», «Соңғы вальс», «Көк тудың желбірегені», «Әдемі-ай» әндерінің авторы. 

Оңтүстік Қазақстан облысы, Ордабасы ауданы, Бөржар ауылында туған ақын Шымкент педагогикалық институтында жалпы техникалық пәндер, еңбек және физика пәнінің мұғалімі, Алматы мемлекеттік университетінде заңгер мамандықтарын меңгеріп шыққан. 2008 жылы Германияның Шпайер қаласында Әкімшілік ғылымдар жөніндегі Неміс университетінде мемлекеттік қызметкерлердің курсында оқып, арнайы білім алған.

Кеш барысында жазушы һәм қоғам қайраткері балалық шағынан, отбасы туралы жылы естеліктерін айтты.

Әкім Ысқақты ұстаздар династиясының өкілі десе де болады. Үлкен атасы туған ауылында мектеп салдырып, оған Абай Құнанбайұлының есімін бергізген екен.

Тұңғыш қазақ тілінде «Халықтың көші-қоны туралы» заңын жазған депутат ретінде Әкім ағамыздың есімі тарихта қалды. Осы заңның арқасында алыс және жақын шетелдерден 300 мыңға жуық отбасы көшіп келіп, 1 миллионнан аса қандас атамекенге оралды. 

Кеш барысында Шығыстың өнерпаздары жазушының шығармашылығымен етене жақын екендіктерін көрсетті. Ақынның өлеңдері оқылып, әндері шырқалды. «Әкім Ысқақтың екі ауыз есті сөзін тыңдайық» деп, қара сөздің қадірін түсініп, бағалайтын өскемендік оқырмандар жиналған іс-шара өте жоғары деңгейде өтті.

Белгілі қоғам қайраткері кешеден бері Шығыстың жас ақындарымен, педагогикалық колледждің оқушыларымен жүздесіп, тағылымы мол әңгімелерімен, естеліктерімен бөлісті.

Айна Бакимбаева 

Фото/видео: Жәнібек Ырысбай