Үлкен теннистен облыс орталығында өткен халықаралық “Kazzinc Onep W15” турнирі аяқталды.

“Smash” орталығында өткен жарыста 15 елдің спортшылары бақ сынады, деп хабарлайды Altaynews тілшісі. 

Тамыздың 7-сі  мен 12-сі аралығында өткен халықаралық әйелдер турнирінде ел спортшылары жақсы нәтиже көрсеткен. Ал финалдық ойынға шыққан Аружан Сағындықова Жапон елінен келген қарсыласы Кошиши Аюмимен сынға түсіп, 0:2 есебімен есе жіберді.

- Бүгінгі жарыс өте жоғары деңгейде өтті. Қарсыласым менен қарағанда әлде қайда тәжірибелі. Жарыс басталғанда сәл қобалжып қалдым. Алайда жеңіс үшін барымды салдым. Бүгінгі жетістігім кәсіби мансабымдағы ірі жетістіктердің бірі десем болады, - дейді теннисші Аружан Сағындықова.