Шығыс Қазақстанның скандинавиялық жаяу жүрістен облыстық және республикалық жарыстарға жеке команда болып қатысатын өз құрамасы болуы қажет. Мұндай бастаманы өскемендік зейнеткер Әбілқайыр Иманбеков көтерді, деп хабарлайды Altaynews.kz тілшісі.

Жалпы, Өскеменде осы бір спорт түрінің танымалдығы уақыт өткен сайын артуда. Бұған аталмыш спортқа ден қойғандардың санына қарап-ақ көз жеткізуге болады. Қазір облыс орталығында ғана скандинавиялық жаяу жүріспен шұғылданатындардың саны бірнеше жүз адамды құрайды.
Мамандардың айтуынша, скандинавиялық жүріс көп дайындықты қажет етпейді, нұсқаушымен өткізген бірнеше сабақтың өзі жеткілікті. Спортшылардың жасына да шектеу жоқ. Бұл спорт түрімен кез-келген адам шұғылдана алады. Оның үстіне, скандинавиялық жүрістің денсаулыққа пайдасы зор.

Әбілқайыр Иманбеков алдағы уақытта облыс орталығында скандинавиялық жаяу жүрістен марафон ұйымдастыруды да ұсынды. Оның айтуынша, жоспарлы марафон Самал саябағынан басталып, Өзен бекетінде аяқталмақ.

Нұржан Кенжеұлы