15–17 қаңтар аралығына арналған болжам бойынша Қазақстанда қыс қаһарына мініп, тұрғындарды сары аяз қыспаққа алмақ. Синоптиктердің хабарлауынша, бұл кезеңде еліміздің көп бөлігінде антициклондық ауа райы сақталады, деп хабарлайды Altainews.kz тілшісі.

Кей аймақтарда ауа температурасы –40 градустан төмендеп, суық бірнеше күн қатарынан сақталуы мүмкін. Осыған байланысты мамандар тұрғындарды қауіпсіздік талаптарын қатаң сақтауға шақырады.

Қатты аяз кезінде үйлер мен пәтерлерде пештер мен электр жылытқыштарына түсетін жүктеме де артады. Сондықтан оларды пайдалану барысында аса сақ болған жөн.

Төтенше жағдайлар департаментінің мәліметінше, 2026 жылдың басынан бері Шығыс Қазақстан облысында 37 өрт тіркелген. Басты себеп – пешті пайдалану кезінде қауіпсіздік ережелерін сақтамау, электр жабдықтарын қолдану қателіктері, отты абайсыз пайдалану. 

Мамандар сары аязда денсаулыққа да ерекше мән беру қажеттігін алға тартады. ҚР ТЖМ Апаттар медицинасы орталығының дәрігері Ержан Мұсаның айтуынша, қатты суықта ашық ауада ұзақ уақыт жүру қауіпті.

Мамандар үсік алған жағдайда аязға ұшыраған жерді қармен ысқылауға, оттың жанында немесе ыстық сумен жылытуға болмайтынын ескертеді.

Сонымен қатар пештің айналасында жиһаз, кілем, отын, киім-кешек сияқты оңай тұтанатын заттар тұрмауы тиіс. Күлді уақтылы тазалап, оны жанбайтын металл ыдысқа салып, үйден алыс жерге шығару қажет. Мұржаны күйеден тазалап, үнемі бақылаған жөн.

Тағы бір ескерер жайт, жылытқыштарды жабуға немесе үстіне зат қоюға болмайды, бұл өрт қаупін күшейтеді. Қатты аязда дұрыс оқшауланбаған су құбырлары да қатып қалуы мүмкін. Оларды жылыту кезінде ашық отты пайдаланбай, қауіпсіз тәсілдерді таңдаған абзал.

Фото: ШҚО ТЖД