Жақында желтоқсанның бесі күні Ресей Федерациясының Екатеринбург қаласында керемет кәсіпқой бокс кеші өтеді. Осы бір айтулы іс-шарада жерлесіміз Мейірім Нұрсұлтанов ресейлік былғары қолғап шебері Илья Баландинге қарсы жұдырықтасатын болады.

Мейірім Нұрсұлтанов 1993-жылы Шығыс Қазақстан облысы, Аягөз ауданы, Мыңбұлақ ауылында дүниеге келген.

2009 жылдың қараша айында 16 жасар Мейірім Орал қаласында 1992-1993 жылдары туылған жастар арасында өткен Қазақстан Республикасы чемпионатында 64 келі салмақ дәрежесінде жеңіске жетіп, Азия чемпионатына жолдама алды.

2010 жылдың наурыз айында Тегеранда (Иран) 64 кг дейінгі салмақта жастар арасында Азия чемпионы атанды.

2012 жылы 19 жасында 69 кг дейінгі салмақта Астанада өткен бокстан ересектер арасындағы Қазақстан чемпионатының қола медалін иеленеді.

2014 жылдың желтоқсан айында Тараз қаласында 75 келіге дейінгі салмақта Қазақстан чемпионы атанды.

Сол жылы “Astana Arlans” Бүкіләлемдік бокс сериясының (WSB) “Astana Arlans” жартылай кәсіби командасына шақырылды. 2015 жылғы маусымның басты кейіпкерлерінің бірі болды. 75 келіге дейінгі салмақ дәрежесінде барлық жекпе-жектерді жеңіп, финалда “Cuba Domadores” (3:0) командасының Кубалық Лопес Кардонаны сенімді түрде жеңіп, “Astana Arlans”-тың екінші рет WSB чемпионы атануына үлкен үлес қосады.

Бауырымыз алғаш рет 2016 жылдың 19 қарашасында кәсіпқой бокс рингіне көтеріліп АҚШ-тың Лас Вегас қаласындағы Ти-Мобайл» Аренада Генри Бекфордті (4-5-0) тізе бүктіріп, 15.04.2017ж. Хавьер Ольвера (1-0-0), 14.07.2017ж. Лэнни Дардара (5-7-2), 9.09.2017ж. Исмаэль Буэно (15-6-0), 25.11.2017ж. Эрик-Мун (7-0-0, 6КО), 3.03.2018ж. Алехандро Торрес (9-3-2), 23 06.2018ж. Хосе Обандо (16-20-1, 12КО), 4.08.2018ж. Хонатан Батиста (18-14-0, 11КО), 13.09.2018ж. Джамар Фримэннен басым түсіп (15-6-2, 8КО) NABFunior Middleweight Title бос чемпиондық белбеуін жеңіп алады. Мұнан кейін 11.01.2019ж. Рамон Агинга (13-1-0, 9КО) 24.03.2019ж. Луис Эрнандес (16-7-0 9КО), 24.08.2019ж. Артур Осипов (15-1. 10КО), 3. 11.2019ж. Кристиан Оливастан (16-5 13КО) басым түсіп WBC (USNBC) нұсқасы бойынша орта салмақтан чемпион белбеуін иеленеді. Осыған дейінгі 13 кездесудің 8-ін мерзімінен бұрын аяқтаған жеңімпаз жерлесіміз 14-ші қарсыласына да тыңғылықты дайындық жүргізуде.

Білікті мамандардың пікірінше Нұрсұлтанов пен Баландин кездесуінің фавориті ретінде Қазақстандықтың аты жиі аталады.

“NABF Junior” және WBC тұжырымдары бойынша белбеулердің иегері Мейірімнің «Main Events» компаниясымен келісім-шартқа отырғаны, промоутері – Кэти Дува, ал, менеджері – Эгис Климас сынды үлкен компания, білікті мамандар екенін оқырман қауым жақсы біледі деген ойдамын. Сондай–ақ, әлемдік деңгейдегі тәжірибелі бапкер Джеймс Бадди Макгирттің өзі дайындайды. Сонымен қатар қазақ боксының жарық жұлдызы Әлем чемпионы туған ағасы Мерей Ақшаловтың да үйретері мол екеніне талас жоқ.

Алайда бұл бокс. Спортта күтпеген жағдайлар да орын алып жататыны белгілі. Дегенмен біз өз былғары қолғап шеберіміз, жерлесіміз Мейірім Нұрсұлтановқа сенім артамыз. Барша жерлестері, қазақ елі болып сол күнгі бокс бәсекесінен тек жеңіс күтеміз. Боксшымызға Жаратушымыз жар болып, жанкүйерлер сенімі ақталып, бір-бірімізден сүйінші сұрайтын шаттықты шаққа жетейік.