Марқакөлде тасқынның алғашқы толқыны тыныш өтті
сурет редакция архивінен
Су тасқынының екінші кезеңінде таудағы қар еріп, өзен-сулардың деңгейі көтеріледі деген болжам бар. Қазір таудағы қардың қалыңдығы шамамен бір метрдей болады, деп хабарлайды Altainews.kz тілшісі.
Қарғын судың алдын алу мақсатында Марқакөл ауданының маңындағы су қоймасы тексерілді.
- Бұл су қоймасы Республикалық су ресурстары кәсіпорнының қарамағында. Жақында оны Марқакөл ауданының қарамағына алу туралы құжаттар әзірлейміз. Су қоймасының қауіпсіздігін арттыру үшін оны қайта жаңарту туралы жобалық-сметалық құжат жасауымыз керек. Жыл соңына дейін бұл жұмыс қолға алынады деп ойлаймын, -дейді Марқакөл ауданы әкімінің міндетін атқарушы Рүстембек Кемешев.
Бөгетті тексерген мамандар оны қар суына төтеп бере алады деген қорытынды жасады.
Айта кетейік, бұл өңірде жазықтағы қар еріп бітуге таяды.
- Тасқынның бірінші кезеңін штаттық режімде, тыныш өтті десек болады. Күн жылынғалы Марқакөл ауылында қар жылдам еріп бітті. Ал таулы аймақтарда әлі қалың. Ауа температурасы түнде -5, ал күндіз +10, +12 градусқа дейін көтерілуде. Соның арқасында таудағы қар біртіндеп еріп жатыр, - деді Рүстембек Кемешев.
Дегенмен арқаны кеңге салуға болмайды. Мамырдың басында таудағы қар жылдам еріп бастайды. Тасқынның екінші кезеңіне қазір дайындық қызу жүргізіліп жатыр. Өзендердің, каналдар мен арықтардың арналары кеңейтіліп, Теректі мен Қалжыр өзендеріндегі су деңгейі ұдайы бақылауға алынған.
Оқи отырыңыз
