Марқаның таулы аймақтарында қардың қалыңдығы әлі де болса 2,5 метрге жетеді, ал күн райының салқын болуынан ауданның елді мекендеріндегі қар баяу еріп жатыр. Су тасқыны қаупі төніп тұрған жоқ, деп хабарлайды Altainews.kz тілшісі.

Марқакөл ауданы әкімінің міндетін атқарушы Рүстембек Кемешевтің айтуынша, бүгін арнайы комиссия Теректі өзеніндегі осы өңірдегі жалғыз су қойма - Ортатеректінің жағдайын кезекті рет бақылап қайтты. 

Оның айтуынша, қазір Марқакөл ауданында су тасқынына байланысты жағдай тұрақты. Өңірде ауа температурасы күндіз 7 градусқа дейін жылынса, түнде - 1 градусқа дейін нөлден төмендейді. Сондықтан қар біртіндеп еріп жатыр, қарғын судан келер қауіп жоқ.

Айта кетейік, жаз маусымында аталған су қойма таулы егіс алқаптарын және жайылым жерлерді суаруға, сондай-ақ жайлаудағы малды суаруға қолданылады.