Өскеменде шағын кәсіпорынның есепшісі өзінің қызметтік жағдайын пайдалана отырып, 13 485 062 теңге жымқырған, деп хабарлайды Алтайньюс тілшісі.

Кәсіпорын өкілінің шағымынан кейін полиция қызметкерлері істің мән-жайын анықтады. Есепші аталған қаражатты екі жыл бойы біртіндеп жымқырған.

– Жедел-іздестіру іс-шараларын жүргізіп, Ертіс полиция бөлімінің қызметкерлері 50 жастағы күдіктіні ұстады. Ол өз кінәсін мойындады. Қазіргі уақытта ҚР ҚК 189-бабы бойынша сотқа дейінгі тергеу басталды, – деп мәлімдеді ШҚО ПД баспасөз қызметі.

Айта кетейік, күдіктінің мүлікті тәркіленеді, сондай-ақ 7 жылдан 12 жылға дейінгі мерзімге бас бостандығынан айырылуы мүмкін.