ШҚО әкімі азаматтарды жеке мәселелері бойынша онлайн форматта қабылдады, деп хабарлайды Altaynews тілшісі.

Бұл туралы облыс басшысы әлеуметтік желідегі жеке парақшасында жазды.

Аймақ тұрғындарынан түскен сұрақтардың дені қабылдау барысында оң шешімін тапқан екен.

Мысалы, Азамат Бойғонов есімді азамат Өскемен қаласындағы мүмкіндігі шектеулі балаларды оңалту орталықтарына тасымалдау проблемасын көтерді. Даниал Ахметов мәселені шешу мақсатында облыстық бюджеттен 29 млн. теңге бөлуді тапсырды.

- Осы ретте тоқтала кетер жайт, өңірдегі арнайы қызмет көрсету орталықтарындағы кадр тапшылығын жою, мамандардың біліктілігін арттыру, қажетті жабдықтармен қамтамасыз ету бағытындағы проблемаларды түпкілікті шешу үшін республикалық комиссиямен бірлесе Облыстық жұмыспен қамту және әлеуметтік бағдарламаларды үйлестіру басқармасы әзірлеп жатқан бағдарлама негізінде шешімін табады, - дейді аймақ басшысы.

Қабылдауда кәсіпкерлерден келіп түскен бірқатар мәселелер де қаралды.