Өскеменге Таиланд астанасы Бангкоктан Ресей азаматтары да ұшып келуі мүмкін. Бұл туралы Таиланд корольдігіндегі Ресей елшілігінің ресми сайтында жазылған.

«Қазақстан Республикасы Сыртқы істер министрлігі «Бангкок – Өскемен» чартерлік әуе рейсін шығарғаны мәлім. Осы рейспен елге қайтуды ойлаған Ресей азаматтары да ұша алады. Біз Таиландтағы Қазақстан елшілігімен келістік. Ұшақтағы орын саны шектеулі. Билет бағасы: 500 доллар. Баса айта кетерлігі, азаматтардың Өскеменнен Ресей шекарасына және одан ары қарай үйіне жетуі өздерінің қолдарында. Қазақстан аумағында карантин ережелерін де сақтай білуі керек», – делінген Ресей елшілігінің ақпаратында.

СКАТ әуе компаниясының сайтында «Бангкок-Өскемен» билетінің бағасы 172 956 теңге деп көрсетілген. Сонымен қатар онда «Денпасар (Индонезия) – Өскемен» билеттері де сатылуда. Бағасы: 173 018 теңге.

Уk.kz сайтының жазуынша, «Бангкоктан 14 сәуір сағат 14:30-да шыққан ұшақ сол күні Данпасарға қонады. Ол ұшақ Денпасардан сағат 20:00-де шығып, Өскеменге 15 сәуір күні 9:30-да жетеді».

Ал осы ұшақпен Өскеменге келген жолаушылар карантинге жабыла ма; жабылмаса қайда барады; олар жабық қаладан қалай шығады – бұл сұрақтарға әлі жауап айтылмады.