Семей қаласы ақпараттық орталығының мәліметінше, қала басшысы Ермак Сәлімовтың әлеуметтік желідегі парақшасына Бобровка кентінің тұрғындары толғандыратын мәселелері туралы жазған.​ Бұл аталған мәселелер қатары қала әкімінің бақылауында. Осы мақсатта қала әкімі Бобровка кентінің тұрғындарымен кездесті, деп хабарлайды Алтайньюс тілшісі.

Кенттің тұрғындарына ауыз су мәселесі аса қиындық туғызып тұр. Бірнеше жыл бойы судың тапшылығын көріп келе жатқан тұғындар қала әкіміне осы мәселені қолға алуын өтінді.

-​ ​Жалпы Семей қаласы бойынша бір емес бірнеше жер ауыз сумен қамтамасыз етілмеген. Алайда осы істі аяқсыз қалдырмай бір ретке келтіргендіктен,​ бүгінде көп жерлер сумен де, жарықпен де толық қамтылып отыр. Ендігі кезек Бобровка кентіне келді.​ Кенттің жағдайымен толық таныспын. Мәселелер қатары менің бақылауымда.​ Ауыз су бойынша жобалық смета жұмыстарын жасап, арнайы қаражат қарастырып, келесі жылы толық ауыз сумен қамтамасыз ететін боламыз. Арнайы су құбырлары үйлеріңіздің алдына дейін тартылатын. Мәселе шешілгенше көше бойындағы су колонкалары қосылып тұрады. Ал жарық мәселесі бойынша мамандар әр үйдің жарығының қуаттылығын тексеріп, қосымша жарық трансформаторлары қойылады, - деді қала әкімі.

Қала тұрғындарын толғандыратын тағы бір мәселе – автобустың сирек қатынауы.

-​ ​Алдағы уақытта жаңа автобустар жүре бастайды. Халықтың қолайлылығы үшін бұл автобустар қысқы - жазғы ауысым деп бөлінбей, жұмыс кестесіне лайық таңертеңнен кешке дейін жүретін болады, -деді қала әкімі.

Сонымен қатар,​ Ермак Сәлімов кенттің тазалық жұмыстарымен де танысты. Тұрғындар ортақ тазалық жұмыстарын өткізуге, келісімшарт жасауға асықпайтын көрінеді. Осы ретте қала әкімі қызмет көрсету мекемесіне және полиция қызметкерлеріне айналаны қоқыстан тазарту жұмысын қолға алу жөнінде арнайы тапсырма беріп отыр.