Өскеменде 2012 жылдан бері жөндеу көрмеген Әуезов даңғылын кеңейту жұмысы басталып кетті. Жөндеу жұмысы қазан айына дейін созылады, деп хабарлайды Алтайньюс тілшісі.

Мамандар көшенің 1 300 метрі кеңейтіліп, 2 300 метрінің жиектасы ауыстырылатынын айтады. Жалпы 38 200 шаршы метр аумаққа асфальт төселеді екен.

Сондай-ақ Горький-Нұрмағамбетов көшелерінің аралығындағы аумаққа бір жолақ қосылады. Сонымен, көше төрт-төрттен сегіз жолақты болады. Бір жолағының ені – 3,5 метрге тең екенін айта кетейік.

Ал көшенің ортасында тұрған Мұхтар Әуезовтың ескерткіш тақтасы жазушының өз аты берілген №17 мектептің аумағына ауыстырылады.

– Қолайсыздықтар үшін кешірім өтінеміз. Түсіністікпен қарауларыңызды сұраймыз, – деп, қала әкімдігі тұрғындардан алдын ала кешірім өтінді.