Ешқандай сағатқа, сенбі мен жексенбіге қарамай жұмыс істеп, өзі бес жыл басшы болған, еңбек еткен  Шығыстың шырайын кіргізіп, Өскеменді өсіріп кеткен қоғам қайраткері Бердібек Сапарбаевтың есімі облыс орталығындағы   «Үміт» арнаулы әлеуметтік қызметтерге мұқтаж балаларды қолдау орталығының тәрбиеленушілері үшін  де ардақты, деп хабарлайды Altainews.kz тілшісі.

9 ақпан  - Бердібек Мәшбекұлының туған күні қарсаңында  орталықтың тәрбиеленушілері қоғам қайраткеріне арнап еске алу кешін өткізіп, өздері тұрып жатқан шаңырақтың ішінен «Б.М.Сапарбаев атындағы алаң» ашты.

Рухани кеште бас қосқан «Үміт» балаларды қолдау орталығының  тәрбиеленушілері мен осындағы тәрбиешілер Бердібек Мәшбекұлының балалық шағы, отбасы, өнегеге толы өмір жолы туралы телесұхбаттарды тамашалап, елінің ардақты ұлы туралы естеліктерін айтып, еңбектерін еске алды.

Еске алу кешінде «Үміт»  арнаулы әлеуметтік қызметттерге мұқтаж балаларды қолдау орталығының директоры Майра Бейсеқанова мен облыстық білім басқармасының басшысы Иннеса Чернышева «Б.М.Сапарбаев атындағы алаңды» салтанатты түрде ашып, орталықтағы ұл қыздарды ұлтқа қызмет етудің үлгісін көрсетіп кеткен азаматтың өнегелі жолын жалғастырып,  өз Отанын өркендетуге үлес қосар ұлағатты ұрпақ болуға шақырды.

 Жанаргүл Мұқатай