Шығыс Қазақстан облысының бұрынғы әкімі, танымал саясаткер, көрнекті  мемлекет және қоғам  қайраткері, арда азамат Бердібек Сапарбаевты еске алу мақсатында облыс орталығында түрлі спорттық сайыстар, волейболдан, күрестен, стол теннисінен жарыстар, әртүрлі мәдени іс-шаралар өтіп жатыр.

Оралхан Бөкей атындағы қалалық кітапханада облыстық ардагерлер ұйымы ұйымдастырған «Мен ешқашан тура сөйлеуден қорықпадым...» атты кеште  Бердібек Сапарбаевтың тұлғасы хақында бейне ролик көрсетіліп, үзеңгілес әріптестері, бірге жұмыс істеген азаматтар естеліктерімен бөлісті, деп хабарлайды Altainews.kz тілшісі.

 «Ат аунаған жерде түк қалады» демекші, Бердібек Мәшбекұлының Шығыстың руханиятын көтеруге, Өскемен қаласына ұлттық рухын оятуға қосқан үлесі өлшеусіз. Ол кісі халықтың есінде, ең алдымен, ұлтжандылығымен, қарапайымдылығымен есте қалды. Облыс орталығының қақ төріне Абайдың ескерткішін орнатып, қолына найзасын ұстаған Қабанбай батырдың, Халық қаһарманы Қасым Қайсеновтың ескерткіштері бой көтерді. Жамағат үшін еліміздегі ең көрікті мешіттердің бірі Халифа Алтай мешітін асарлатып, салып берді. Екі рет вице-премьер-министр, екі рет әлеуметтік саланың министрі міндеттерін атқарған, әр жылдары еліміздің бес өңірін басқарған Бердібек Сапарбаевтың біздің өңірге деген ықыласы да, пейілі де ерекше болатын. Ол кісі басқарған жылдары өлкеміздің әлеуметтік-экономикалық саласы өркендеп, халықтың әл-ауқаты жақсарды. «Туған жерге-тағзым»,  «Туған жер – алтын бесігім» сияқты патриоттық шаралар ұйымдастырылды.

Бердібек Сапарбаев облыста орын алған су тасқыны кезінде аяғына резеңке етік киіп, алдыңғы шепте жүрді. Шахтерлердің жұмысымен танысам деп, жер астына да түсті, санавиацияның жұмысын бағалау үшін шалғай аудандарға тікұшақпен көкке де ұшты.

Кеште естелік айтқан облыстың бас имамы Ермек Мұқатаев Халифа Алтай атындағы орталық мешіттегі музейде  Бердібек Сапарбаевтың бұрышын ашу ойлары барын жеткізді.

Тоғызыншы ақпанда орталық мешітте Бердібек Сапарбаевтың рухына бағышталған құран-қатым түсіріледі.

Фото: Аяужан Утеулинова