Жасыл құрлықты мекендейтін эму түйеқұстарын климаты қатаң Қазақстанға, оның ішінде қысы қаһарлы Шығыс өңіріне жерсіндіруге болады екен. Осыдан бір жыл бұрын австралиялық түйеқұстарды Зайсанға әкеліп, өсіріп жатқан жеке кәсіпкер Ержанаттың тәжірибесі бұған дәлел.

Жеке кәсіпкер экзотикалық құстың бұл түрін қолда өсіріп ғана қоймай, пайдасын да көре бастаған. Келешекте оның жұмыртқасын сатып, табыс таппақ, деп хабарлайды Altainews.kz тілшісі. 

Кәсіпкердің айтуынша, түйеқұсты ауылға әкелмес бұрын алдын ала зерттеулер жүргізген. Нәтижесінде эмудың біздің өңірдің қатаң климатына тез бейімделе алатыны белгілі болған. Өйткені ол ыстыққа да, суыққа да төзімді. Азық та талғамайды. Малға беретін жоңышқа мен құрама жемді жей береді. Бір түйеқұс күніне 3 кг шамасында жем жейтін көрінеді. Сонымен қатар өздеріне қарайтын адамдарға тез үйреніседі екен. Демек басқа адамдар келген кезде мінез көрсетуі де мүмкін. Қазір шаруашылықта тоғыз түйеқұс бар.

 Эмудың ересек түрлерінің салмағы 75-80 кг болады. Бойы 170-190 см шамасында. Олар желге, суыққа төзімді, қыста да далада жүре береді. Бір маусымда 20-50 жұмыртқа табады. Жұмыртқасының салмағы 2,5-4 кг болады. Олардың тіршілік ету ұзақтығы шамамен – 25-35 жыл.

Қуаныш Рахметоллаұлы