Жасыл жұмыртқа табатын қара тауық өсіріп отыр – ШҚО
Шағын кәсіпті дамытуға қолдау көрсету - мемлекеттің басты мақсаттарының бірі. Бұл мүмкіндікті әр өңірдің тұрғындары тиімді пайдаланып келеді. Соның бірі ретінде тауық өсіріп отырған тарбағатайлық Бауыржан Қалиевті айтуға болады.
Тарбағатай ауданының маңырақ ауылының тұрғыны 1 млн 380 мың теңге қайтарымсыз грант алып кәсіп бастаған, деп хабарлайды Altaynews.kz тілшісі.
Шағын кәсіптің тізгінін қолға алған Бауыржан Қалиев тауық өсіріп, жұмыртқа сатып отыр. Ол тәжірибе ретінде жасыл жұмыртқа табатын қара тауықты да қоса сатып алған. Қазіргі уақытта жұмыртқасын да, тауығын да сатып пайда тауып отыр.
– Шағын кәсіпті қолдау бойынша мемлекеттен 1млн 380 мың теңге қайтарымсыз грант алдым. Тәжірибе ретінде әдеттегі тауықтармен бірге жасыл жұмыртқа туатын қара тауықты да қоса сатып алдым. Білуімше жасыл жұмыртқаның денсаулыққа пайдасы көп екен. Бағасы да басқа тауықтан қымбат. Алдағы уақытта тағы сатып алып, санын көбейтетін боламын. Сондай-ақ қазір жұмыртқа мен бірге қақталған тауыққа да тапсырыс алып, пысырып беріп отырмыз, – дейді кәсіпкер Бауыржан Қалиев.
Кәсіпкерге әлеуметтік желіде қолдау көрсетіп, нағыз кәсіптің адамы екендігін жазып жатқандар бар.
– Тарбағатайда грантпен жеке кәсіп бастаған жалғыз адам - Бауыржан аға. Өз идеясын іске асыра білді. Бауыржан аға, алда әлі өндіріс ашуға да жетерсіз. Жалпы грантқа қатысатын азаматтар берілген мүмкіндікті дұрыс бағытта пайдалану керек, – деп жазды тұрғындардың бірі инстаграм әлеуметтік желісінде.
Фото мен видео: Бейбітгүл Шаяхметова
Оқи отырыңыз
