2024 жыл Шығыс Қазақстан облысында «Жол жылы» деп жарияланып, аймақта жолдарды жөндеу мен қайта құру жұмыстары айтарлықтай жанданды. Бұл бастама тұрғындардың өмір сапасын жақсартуға, туризмді дамытуға және экономикалық өсімді қолдауға бағытталған.

Бөлінген қаражат көлемі өткен жылмен салыстырғанда 11,1 миллиард теңгеге артып, 31,5 миллиард теңгені құрады, деп хабарлайды Altainews.kz тілшісі.   

2024 жылы облыстық және аудандық маңыздағы, сонымен қатар елді мекендердегі көшелердің орташа жөндеу жұмыстарына 22,3 миллиард теңге бөлінді. Бұдан бөлек, құрылыс және қайта құру жұмыстарына 3,6 миллиард теңге қарастырылды. Жыл бойы жалпы ұзындығы 600 шақырым болатын 114 жоба жүзеге асырылды, оның ішінде туристік бағыттағы 121 шақырым жол жөнделді. 

Биыл республикалық деңгейдегі бірнеше маңызды жоба аяқталды. «Талдықорған – Қалбатау – Өскемен» жолының 768 шақырымдық бөлігі толық пайдалануға берілді, оның 60 шақырымы Шығыс Қазақстан облысының аумағынан өтеді. 

Сондай-ақ, «Қалбатау – Майқапшағай» жолының 415 шақырымы жөнделді, оның 231 шақырымы облыс аумағында орналасқан. Бұл жолдың 211 шақырымына жаңа асфальт төселіп, көлік қозғалысы қамтамасыз етілді. 

2024 жылдың 21 қазанында Бұхтарма су қоймасы арқылы салынған ұзындығы 1 316 метр, ені 12,2 метр болатын екі жолақты көпір іске қосылды. Бұл көпір жалпы ұзындығы 19,978 шақырымды құрайтын жаңа автожолмен бірге пайдалануға берілді. Бұл жобаның жалпы құны 61,4 миллиард теңгені құрады. 

Рахман қайнары бағытына апаратын төрт көпірде күрделі жөндеу жұмыстары жүргізілді. Атап айтқанда, «Өскемен – Алтай – Үлкен Нарын – Катонқарағай – Рахман қайнары» автожолының Берел ауылынан Рахман қайнарына дейінгі учаскедегі көпірлер жөнделіп, толық аяқталды. 

«Осинов асуының» 56-72 шақырымы аралығындағы жолды жаңғырту жұмыстары жалғасуда. Ал 72-88 шақырымы бойынша жобалық құжаттама түзетіліп, мемлекеттік сараптаманың оң қорытындысы алынды. 

2024-2025 жылдарға арналған жоспарларға тоқталар болсақ, келесі жылдары 17 нысанда орташа жөндеу жұмыстары жүргізілмек. Оның ішінде «Өскемен – Алтай – Үлкен Нарын – Катонқарағай – Рахман қайнары» бағытында 152 шақырым жол жөнделеді. «Өскемен – Риддер – Ресей шекарасы» бағытында 105 шақырым жолдың 40 шақырымы жаңартылды. «Омбы – Майқапшағай – Қалжыр – Марқакөл» бағыты бойынша 24 шақырым жол 2025 жылы жөндеуге кіріседі. «Өскемен – Семей» бағытының 18 шақырымы толық жөнделді. «Өскемен – Шемонайха – Ресей шекарасы» бағытында 93 шақырым жолдың 21 шақырымы жаңартылды. 

Шығыс Қазақстан облысында «Жол жылы» бастамасы аясында жүзеге асырылған жұмыстар ауқымды нәтижелерге жетті. Орташа жөндеу аясында 392 шақырым жол қамтылып, бұл көрсеткіш рекордтық деңгейге жетті. Барлық іске асырылған жобалардың нәтижесінде облыс аумағындағы республикалық маңыздағы жолдардың жағдайы жақсарып, олардың барлығы талапқа сай «жақсы» санатына ауыстырылды. 

Бұл игі бастама алдағы жылдары да жалғасып, облыстың инфрақұрылымдық дамуына оң серпін берері сөзсіз. Жолдардың жақсаруы халықтың тұрмыс сапасын арттырып қана қоймай, аймақтың экономикалық әлеуетін күшейтуге үлес қосады.