Үлкен Нарын ауданының құрылғанына бір жыл болды. Бұл қысқа мерзімде аудан экономикасы мен әлеуметтік саласында маңызды нәтижелерге қол жеткізіліп, тұрғындардың өмір сүру сапасын жақсарту бағытында ауқымды жұмыстар атқарылды,- деп хабарлайды Altainews.kz тілшісі.

Ауданның дамуына серпін берген жобалардың бірі – әлеуметтік нысандардың жаңартылып, халық игілігіне берілуі. Мәселен, осы кезеңде ауылдық клубтар жөндеуден өтіп, жаңа мектептер мен денсаулық сақтау мекемелері бой көтерді. Бұл ауданның мәдени және әлеуметтік өміріне жаңа тыныс берді.

Соның дәлелі ретінде Жаңа жыл қарсаңында Үлкен Нарын ауданына қарасты Жұлдыз ауылында жөндеуден өткен ауылдық клубтың ашылуын атап өтуге болады.

1950 жылы іргетасы қаланған бұл клуб соңғы жылдары жөндеу жұмыстарының болмауынан жабық тұрған еді. Ауыл тұрғындары көптен бері көтеріп келген бұл мәселе шешімін тауып, клубтың ашылуы тек жастар үшін ғана емес, аға буын өкілдері үшін де көптен күткен қуаныш болды.

Жаңартылған 120 орындық мәдени нысанның жөндеу жұмыстарына облыстық бюджеттен 40,6 миллион теңге бөлінді. Жөндеу жұмыстарын «Айбар» жеке кәсіпкерлігі атқарды. Ғимаратта концерт залы, жеке аудиториялар мен киім ауыстыратын бөлмелер қарастырылған.

Аталған клуб Жұлдыз ауылының көркін аша түсіп, ауыл өміріне жаңа серпін береді. Енді мұнда ауылдық көркемөнерпаздарға, жастардың бастамаларына қолдау көрсетіліп, мәдени шаралар ұйымдастырылмақ.