Шығыс Қазақстан облысында ауылдардың әлеуметтік және инженерлік инфрақұрылымын жаңғырту мақсатында іске асырылып жатқан «Ауыл – ел бесігі» мемлекеттік бағдарламасы өңір тұрғындарына үлкен игілік әкелуде. Елді мекендердің заманауи талаптарға сай дамуы үшін бөлінген қаржы өз нәтижесін беріп, ауыл өмірінің сапасын арттыруға айтарлықтай үлес қосып отыр, деп хабарлайды Altainews.kz тілшісі.

«Ауыл – ел бесігі» жобасы – Мемлекет басшысының бастамасымен қолға алынған, ауылдық елді мекендерді дамытуға бағытталған ауқымды бағдарлама. Оның негізгі мақсаты – ауыл тұрғындарының өмір сүру сапасын жақсартып, жастардың ауылда тұрақтап қалуына жағдай жасау. Бұл мақсатта әлеуметтік және инженерлік инфрақұрылымды жаңғыртуға айрықша назар аударылып, мектептер, ауруханалар, мәдениет және спорт нысандары, сондай-ақ жол және жарықтандыру жүйелері жаңартылуда.

Шығыс Қазақстан облысында ауылдық елді мекендер саны республика бойынша 12-ші орында. Бұл өңірде 350 ауылдық елді мекен болса, оның ішінде 57 тірек және 127 спутникті ауыл бар. Мұндай ауылдар жергілікті тұрғындардың өмір сүру деңгейін арттыру үшін маңызды рөл атқарады.

Бағдарлама жүзеге аса бастаған 2019 жылдан бері облыста 24,3 миллиард теңге бөлініп, оның ішінде 217 жоба сәтті іске асырылды. Бұл жобалардың арқасында өңірде 14 жаңа әлеуметтік нысан бой көтерді, 34 ғимаратқа күрделі жөндеу жұмыстары жүргізілді, 55 көшеге жарық орнатылды. 

Мәселен, білім беру саласында 12 жаңа нысан пайдалануға беріліп, денсаулық сақтау саласында 16 нысан жөндеуден өтті. Сонымен қатар, 6 мәдениет нысаны жаңғыртылып, ауыл тұрғындары үшін заманауи мәдени-демалыс орталықтары құрылды.

Аталған жұмыстар ауылдық елді мекендердің көркін кіргізіп қана қоймай, тұрғындардың әл-ауқатын жақсартуға да септігін тигізді. Мектептер мен ауруханалар жаңа жабдықтармен қамтамасыз етіліп, ауылдық жерлерде сапалы қызмет көрсету деңгейі артты.

Бағдарлама аясында қаржыландыру көлемі жыл сайын өсіп келеді. 2019 жылы бөлінген қаржы көлемі 1 миллиард теңгені құраса, 2024 жылы бұл көрсеткіш 8,6 миллиард теңгеге дейін жетті. Бұл қаржылық қолдау «Ауыл – ел бесігі» жобасының болашағына деген сенімді нығайтып, оның одан әрі өркендеуіне жол ашуда.

2024 жылы іске асырылып жатқан 89 жоба үшін 10,9 миллиард теңге қарастырылған, оның ішінде республикалық бюджеттен 4,9 миллиард, жергілікті бюджеттен 6 миллиард теңге бөлінді. Бұл қаржы ауылдардың игілігіне бағытталған әртүрлі жобаларды жүзеге асыруға мүмкіндік беруде.

Шығыс Қазақстан облысында тірек және спутникті ауылдардың дамуы ерекше қарқынмен жүзеге асуда. Тірек ауылдарда сапалы инфрақұрылым мен қызмет көрсету жүйелерін құру – ауыл тұрғындары үшін өмір сүру деңгейін жаңа деңгейге көтерудің маңызды қадамы. 

Мәселен, Қасым Қайсенов кентінде жаңа мәдениет және демалыс орталығының құрылысы қолға алынып, ауыл тұрғындары үшін мәдени шараларға қатысуға және демалуға жаңа мүмкіндік жасалуда. Сонымен қатар, Айыртау және Герасимовка ауылдарындағы амбулаториялар жөндеуден өтіп, заманауи медициналық қызмет көрсетудің қолжетімділігі артуда. Тарбағатай ауданының Тұғыл ауылындағы дене шынықтыру-сауықтыру кешені халықтың салауатты өмір салтын қалыптастыруға мүмкіндік береді.

Бағдарлама ауылдық жерлерде жастардың тұрақтап қалуына оң әсерін тигізуде. Ауылдардағы жаңа спорттық және мәдени нысандар жастардың бос уақытын тиімді өткізуіне, олардың шығармашылық және физикалық қабілеттерін дамытуына жағдай жасайды. Сондай-ақ, жаңадан ашылған жұмыс орындары жастардың ауылда жұмыс істеп, отбасын құруына мүмкіндік береді. 

«Ауыл – ел бесігі» жобасы Шығыс Қазақстан облысындағы ауылдық елді мекендердің жаңа серпін алуына мүмкіндік беріп отыр. Мемлекеттік бағдарламаның арқасында өңірдің әлеуметтік және экономикалық келбеті жақсарып, ауыл тұрғындарының өмір сүру сапасы жоғары деңгейге көтеріле бастады. Бұл бастама ауылдардың әлеуетін арттыруға ғана емес, елдің болашақ дамуына да үлкен үлес қосуда. Ауыл – елдің түпқазығы екені сөзсіз, ал «Ауыл – ел бесігі» жобасы ауылдарымызды жаңа белестерге шығаруға жол ашатын маңызды қадам болып қала береді.