Ұлы Отан соғысындағы Жеңістің 80 жылдық мерекесіне орай Риддерде соғыста ерлікпен қаза тапқан Кеңес Одағының батыры Төлеген Тоқтаровтың ескерткішіне гүл шоқтарын қою рәсімі өтті, деп хабарлайды Altainews.kz сайтының тілшісі.

Салтанатты жиын майдан даласында ерлікпен қаза тапқан боздақтарды бір минут үнсіздікпен еске алудан басталды. Шараға қала тұрғындары, қоғам белсенділері, мектеп оқушылары мен жергілікті билік өкілдері қатысты. Жиын барысында Төлеген Тоқтаровтың Отан үшін жасаған ерен ерлігі аталып өтті.

 «Біздің бүгінгі бейбіт өмірге Төлеген Тоқтаров сынды батырларымыздың арқасында қол жетті», – делінді жүргізушілердің сөзінде.

Батырдың ескерткішіне алғашқы болып немере қарындасы Жұмабике Байкенова мен қала әкімі Думан Рахметқалиев гүл шоқтарын қойды. Оларға ілесе қаланың қорғаныс істері жөніндегі бөлімі мен жергілікті өндіріс ошақтарының ұжымдары, сондай-ақ басқа да ұйым қызметкерлері  батыр рухына тағзым етті.

Тағылымды шара – Отан үшін от кешкен ержүрек батырдың ерлігі ешқашан ұмытылмай, ел жадында мәңгі сақталатынының дәлелі. Ұлы Отан соғысындағы Жеңістің 80 жылдық мерейтойына арналған мерекелік іс-шаралар легі көпшіліктің орталық алаңда өткен концерттік бағдарламаны тамашалап, «Даңқ обелискі» мемориалына гүл шоқтарын қоюымен ары қарай жалғасты.

Фото/Видео: Ермек Жиенбеков