Қытайдың ірі өнеркәсіптік холдингтерінің бірі – Fujian Longking Co., Ltd өкілдері экология, өнеркәсіп және агротехнология салаларында ынтымақтастық орнатуға дайын екенін білдірді, деп хабарлайды Altainews.kz тілшісі.

Қытай делегациясымен өткен кездесуде Шығыс Қазақстан облысының әкімі өңірдің әлеуеті туралы айтып, металлургия өнеркәсібіне, атом энергетикасына арналған өнімдер (ядролық реакторларға арналған «таблеткалар»), авиация, медицина және басқа да жоғары технологиялық салаларда сұранысқа ие титанға басымдық берді. Сонымен қатар агроөнеркәсіптік кешенге де ерекше назар аударылды: ШҚО-да майлы дақылдар өсіріледі, орман ресурстары дамып келеді, сондай-ақ туристік сала да өркендеуде.

Қытайлық серіктестер тарапынан ынтымақтастықты кеңейтуге қатысты ұсыныстар айтылды. Fujian Longking Co., Ltd холдингінің халықаралық бөлімшесі – International Business Division Fujian Longking Co., Ltd өкілдері өздерінің ауыл шаруашылығы техникасын, роботтандырылған технологиялар өндіруге маманданатынын атап өтті. Жоба менеджері Чжун Вэйхао, бөлімше бас директоры Сун Лэй және оның орынбасары Чжан Чжунпин ШҚО-ға ауыл шаруашылығына арналған заманауи шешімдерді ұсынуға дайын екендерін айтты.

Fujian Longking атмосфералық ауаның ластануымен күресуге арналған жабдықтарды, соның ішінде электрофильтрлер мен газдарды тазарту жүйелерін әзірлеуге және өндіруге маманданған. Компанияның өнімдері Еуропа, Азия, Америка және Қазақстанды қоса алғанда 50-ден астам елге экспортталады. Компания 1000-нан астам патенті, ұлттық ғылыми-техникалық марапаттары мен инновациялық орталықтары бар қуатты ғылыми-зерттеу және тәжірибелік-конструкторлық базаға ие.

Тікелей халықаралық бөлімше – International Business Division сыртқы экономикалық ынтымақтастыққа, шетелдік кеңселерді ашуға және локализацияға, экотехнологияларды, жобалық және сервистік шешімдерді ілгерілетуге жауап береді.

Тараптар Шығыс Қазақстандағы ынтымақтастықтың алғашқы бағыттарын атап өтті: экологиялық техника – ауа мен суды тазарту жүйелері, шаң мен газдарды ұстау, металлургиялық кәсіпорындардағы қалдықтарды басқару; агротехнология – ассортиментті кеңейту мүмкіндігі – тракторлар, ауылшаруашылық роботтары және АӨК-ке арналған ақылды жүйелер.

International Business Division Fujian Longking өкілдері Шығыс Қазақстан облысымен жабдықтармен ғана емес, сонымен қатар экология және ауыл шаруашылығы салаларындағы өңірдің стратегиялық міндеттеріне бейімделген тәжірибе, әдістемелер мен технологиялар беру тұрғысынан да ынтымақтастыққа дайын екенін атап өтті.

Қытай тарапы сондай-ақ жергілікті өнеркәсіптік кәсіпорындарды аралап көруге, олармен өзара іс-қимыл орнатуға, облыстың экологиялық саясатымен танысуға және болашақта өңірдегі экологиялық жағдайды жақсартуға өз үлестерін қосуға ниетті екенін білдірді.

Кездесу соңында тараптар ынтымақтастыққа өзара қызығушылықтарын білдіріп, уағдаластықтарды нақты жобалар деңгейіне жеткізуге ниетті екендерін жеткізді.

Дамир Омаров

Фото: Махаббат Ахметжанова

Видео: Жәнібек Ырысбай