Грузияда өткен семсерлесуден әлем чемпионатында Қазақстан құрамасы тарихи жеңіске қол жеткізді. Ел спортында алғаш рет шпагадан ерлер арасындағы командалық жарыста қазақстандық спортшылар қола жүлдеге ие болды. Бұл жетістік – елімізде спортты дамытуға бағытталған кешенді жұмыстың жемісі, деп хабарлайды Altainews.kz тілшісі Kazinform агенттіктеріне сілтеме жасап.

2025 жылғы әлем чемпионатының тарихи жүлдегерлері – Кирилл Проходов, Руслан Курбанов, Вадим Шарлаимов және Эльмир Әлімжанов. Атап өтерлігі, алғашқы үшеуі – біздің жерлестер, Шығыс Қазақстан облысының тумалары.

Қола үшін шешуші кездесуде Қазақстан құрамасы Францияны 45:31 есебімен айқын басымдықпен жеңді. Осылайша, мұндай деңгейдегі командалық жарыстағы алғашқы медаль тарихқа алтын әріппен жазылды.

Айта кетейік, тарихи жартылай финалға дейін қазақстандық спортшылар Ресей, Қытай және Италия командаларынан басым түсті. Ал жартылай финалда біздің шпажистер Жапониямен тартысты бәсекеде алты ұпай айырмасын сақтап қала алмай, екінші мәрте қатарынан жеңіліп қалды. Маусым айында да Азия чемпионатының финалында сол жапон құрамасынан есе жіберген болатын.

ҚР Мәдениет және спорт министрлігіне қарасты Спортты дамыту дирекциясы (СДД) бұл жеңісті ерекше атап өтті. Баспасөз қызметінің жетекшісі Аян Төлегеннің айтуынша, бұл – Қазақстан үшін жаңа спорт түрлерін бағындыру жолындағы елеулі қадам.

Төлегеннің пікірінше, бұл жетістік Қазақстан спортының дәстүрлі емес бағыттарға да ден қойып жатқанын дәлелдейді.

Спортты дамыту дирекциясы бұл жүлдені жаттықтырушылар штабы, федерация, мамандар мен спортшылардың бірлескен еңбегінің жемісі деп бағалады. Қазақстандық семсерлесушілер шеберліктерін ғана емес, жеңіске деген ерік-жігерін де паш етіп, әлем аренасында ел абыройын асқақтатты.