Өрт – ең қауіпті апаттардың бірі. Бірақ оған қарсы тұрып, өзгелердің өмірі мен қауіпсіздігі үшін өз басын қатерге тігіп жүрген ерлер бар. Солардың бірі – Шығыс Қазақстан облысы Төтенше жағдайлар департаменті Өрт сөндіру және авариялық-құтқару жұмыстарын ұйымдастыру басқармасының бастығы, полковник Болат Нұрдыбаев. Отыз жылын отпен күреске арнаған ол осы салада тер төгіп жүрген жүздеген әріптестері үшін үлгітұтар тұлғаға айналған, деп хабарлайды Altainews.kz тілшісі.

Өрт сөндірушілер жалынның жойқын әсерімен үнемі бетпе-бет келеді. Үйлер, өндірістік нысандар, машиналар, жанғыш материалдармен толтырылған резервуарлар, адам өмірі. Болат Нұрдыбаев 30 жылдан бері отпен күресіп келеді. Ол құтқарылған ғимараттар мен адамдардың қанша екенін нақты есептемейді. Осы уақыт ішінде бірнеше рет өз өмірін қатерге тігуге, қиындықтарды жеңуге тура келді. Болат Нұрдыбаев от тек рухы күштілер ғана жеңе алатын апаттың бірі деп санайды.

Дәл осы мамандықты таңдауға бір жағдай көмектесіпті. 8 сыныптан кейін ол Бауыржан Момышұлы атындағы республикалық әскери мектепке түседі. Әскери-патриоттық тәрбие, шешім қабылдаудың қатаң тәртібі мен жеделдігі өмірде пайдалы болды. Өрт қауіпсіздігі бойынша инженерлерді оқытатын Алматы өрт-техникалық училищесінің жанынан үнемі өтіп жүретін. Бірақ ол кезде тағдырдың қалауымен бүкіл өмірі өрт сөндірумен байланысты болатынын ойламады.

Болат Нұрдыбаев қарапайым өрт сөндірушіден тәжірибелі басшыға дейінгі жолдан өтті, өрт сөндіру бөлімдерінде, кезекші өрт сөндіру қызметінде жұмыс істеді және бірнеше рет ірі өрттерді сөндіруді басқарды. Қызметте жүріп ол жас кезінде қасынан талай рет өткен Алматы жоғары өрт-техникалық училищесін бітіріп алды.

Полковник Нұрдыбаевтың жадындағы ең күрделі өрт – металл қабылдау зауытындағы өрт.

Ол 1997 жылы болған Семей қаласы маңындағы қарағайлы орман өртін және бүкіл Шығыс Қазақстанда өршіп тұрған орман өрттерін, Марқакөл, Самар аудандарындағы егістікке және облыстың басқа аудандарына қауіп төндірген ірі шөп өрттерін өшіруге қатысқан.

Фото: ШҚО ТЖД баспасөз қызметі