Жаңа жылдан МӘМС жарналарының ережелері өзгере ме?
gov.kz
Міндетті әлеуметтік медициналық сақтандыру жүйесіне ай сайынғы жалақыдан аударылатын жарнаның көлемі өседі деп естідік. Бұл қашан басталады және қанша пайызға өседі? Бұдан халықтың табысы азайып қалмай ма? Altainews.kz сайтына Зайсан ауданының тұрғыны Нұргүл Исламқызы жолдаған сауалға "Әлеуметтік медициналық сақтандыру қоры" КеАҚ облыстық филиалы директорының міндетін атқарушы Ирина Степанова жауап береді.
– 2026 жылдан бастап Қазақстанда міндетті әлеуметтік медициналық сақтандыру жүйесіне (МӘМС) жарналар мен аударымдарды есептеу үшін базаның жоғарғы шегі өседі. Бүгінде ол 10 орташа айлық жалақымен шектелген, бірақ келесі жылдан бастап ережелер өзгереді. Жұмыс берушілер үшін аударымдардың ең жоғарғы шегі төрт есе, ал қызметкерлер үшін (жарналар) екі есе артады. Яғни, әркім өз үлесін кіріске пропорционалды түрде қосады. Табыс неғұрлым жоғары болса, жарна соғұрлым жоғары болады. Бұл өзгерістер жұмыс істейтін қазақстандықтардың шамамен 9%-на ғана әсер етеді, көпшілік үшін сомалар өзгеріссіз қалады.
Сарапшылар шекті базаны арттыру ең алдымен Қазақстан азаматтарының жоғары табысты санаттарына бағытталғанын айтады. Бұл өзгеріс – жүйені әділ етуге және сақтандырылғандардың көпшілігіне әсер етпей, жүктемені біркелкі бөлуге мүмкіндік береді.
Бұдан бөлек, 2027 жылдан бастап медициналық қызметтердің бірыңғай пакетін енгізу жоспарлануда. Ашық тізбеде мемлекет қандай қызметтерді қамтитыны және МӘМС шеңберінде қайсысы ұсынылатыны нақты көрсетіледі. Жаңа бастама ашықтықты арттырып, пациенттерге нақты қандай көмек күтуге болатынын жеңіл түсіндіреді.
Дәурен Аллабергенұлы
