АҚШ-тың Лос-Анджелес қаласында жергілікті тұрғын Кен Джонсон күтпеген жағдайға тап болды. Оның үйінің астына ірі қара аю кіріп, бірнеше ай бойы сол жерде тұрақтап қалған, деп хабарлайды Altainews.kz тілшісі The Guardian басылымына сілтеме жасап.

Оқиға өткен күзде басталған. Үй маңындағы бейнебақылау камераларының бірі аюдың қоқыс жәшіктерін ақтарып жүргенін түсіріп алған. Ал келесі күні Кен жертөле тұсындағы кішкентай тесік маңынан аюды көреді. Алғашында ол соншалық үлкен жануардың тар саңылаудан қалай өтетінін түсіне алмаған. Бірақ аю бәрібір үйдің астына кіріп-шығып жүрген.

Үй иесінің айтуынша, бұл жағдай оған қатты үрей мен күйзеліс әкелген. Кен аюды үркіту үшін түрлі әдісті қолданып көріпті: қатты музыка қосу, шу шығару, тіпті «көршінің жағымсыз энергиясы да көмектесер» деп әзілдегені бар. Алайда ешқайсысы нәтиже бермеген.

Уақыт өте келе аю үйдің астын өзіне жайлы мекенге айналдырып, артынан біраз бүлінген із қалдырған. Еденнің астында екі үлкен ойық пайда болып, үйдің құрылымына зиян келгені анықталған.

Мәселеге жабайы табиғатпен айналысатын қызмет те араласқан. Мамандар аюды ұстау үшін арнайы қақпан құрып, түрлі иісті жемдер пайдаланған. Дегенмен бұл әрекеттер ұзақ уақыт нәтиже бермей, аю үйдің астынан шықпай қойған.

Тек жақында ғана Bear League ұйымының мамандары жануарды қауіпсіз түрде үйден алыстатудың жолын тапқан. Олар пейнтбол қаруын пайдаланып, майлы шарлар арқылы аюды үркітіп, үй маңынан шығарып жіберген.

Қазір аю үйдің астында жоқ. Кен Джонсон келтірілген шығынды есептеп жатқанын айтып, жануарға жаны ашығанын да жасырмады. Дегенмен қауіпсіздік үшін оны «көшіріп жіберуге» мәжбүр болған.

Оқиға Лос-Анджелес тұрғындары арасында тез таралып, ауданның ең көп талқыланған жаңалығына айналған.