Шығыс Қазақстан облысының білім басқармасы өңірдегі маусымдық жұқпалы аурулардың көбеюіне байланысты бірқатар мектептерде оқу форматы уақытша өзгертілгенін хабарлады. Соңғы деректерге сәйкес, 23 жалпы білім беретін мектептің 169 сыныбындағы 3015 оқушы қашықтан оқыту форматына ауыстырылд, деп хабарлайды Altainews.kz.

Бұл оқушылардың ішінде 1697 бала — бастауыш сыныптың тәрбиеленушілері. Эпидемиологиялық ахуалға байланысты онлайн форматқа көшкен білім мекемелері өңірдің бірнеше аумағында орналасқан:

Өскемен қаласында – 18 мектеп;

Күршім ауданында – 3 мектеп;

Ұлан ауданында – 2 мектеп.

Білім басқармасының мәліметінше, сыныптағы оқушылардың 30%-дан астамы медициналық анықтамамен дәлелденген себептерге байланысты сабаққа қатыспаған жағдайда қашықтан оқыту режимі енгізіледі. Бұл – оқу үдерісін тоқтатпай, балалар денсаулығын қорғау мақсатында қабылданған алдын алу шарасы.

Соған қарамастан, ведомство өкілдері білім беру үдерісі толық көлемде жалғасып жатқанын, сабақтардың онлайн форматқа бейімделген электрондық платформалар арқылы өткізіліп жатқанын атап өтті. Мұғалімдер мен ата-аналарға әдістемелік қолдау көрсетіліп, оқу материалдары қашықтан меңгеруге ыңғайлы форматта ұсынылуда.

Облыс орталығымен қатар, ШҚО-ның бірқатар аудандарында да тұмау мен өзге де маусымдық инфекциялар көрсеткіші өсіп келеді. Осыған байланысты, алдағы күндері ауылдық және аудандық мектептердің де онлайн оқыту форматына біртіндеп ауысу ықтималдығы қарастырылып жатыр.

Облыстық санитарлық-эпидемиологиялық бақылау департаменті азаматтарды сақтық шараларын барынша күшейтуге, балалардың иммунитетін нығайтуға, адамдар көп жиналатын орындарға барған кезде маска режимін қолдануға және ауру белгілері байқалғанда өзін-өзі емдеумен айналыспай, дереу медициналық көмекке жүгінуге шақырады.

Медицина мамандарының айтуынша, маусымдық респираторлық вирустардың таралуы қараша–желтоқсан айларында шарықтау шегіне жетеді. Осы кезеңде балалар арасында аурушаңдықтың артуы қалыпты құбылыс болғанымен, биылғы көрсеткіш өткен жылдармен салыстырғанда жоғары болуы мүмкін деген болжам айтылуда.

Білім беру басқармасы ата-аналарға үндеу жолдады:

Балада тұмау немесе ЖРВИ белгілері байқалса, мектепке жібермеу;

Дәрігерлер белгілеген ем мен профилактикалық шараларды сақтау;

Қашықтан оқыту кезінде үй жағдайында тыныш әрі сабаққа қолайлы орта қалыптастыру.

Бұған дейін хабарлағанымыздай, Шығыс Қазақстанда биылғы эпидемиологиялық маусымда респираторлық инфекциялар белсенді. Қазан айынан бері өңірде ЖРВИ деректері өткен жылғы көрсеткіш деңгейінде болғанымен, ауырғандардың жартысынан астамы балалар.

ШҚО Санитариялық-эпидемиологиялық бақылау департаменті ақпараты бойынша, Шығыс Қазақстан облысында биылғы күзгі-қысқы маусымның алғашқы апталарынан-ақ ЖРВИ жағдайлары күрт өсе бастады. 1 қазаннан 17 қарашаға дейін облыста 45 937 адам жедел респираторлық вирустық инфекция жұқтырған, бұл көрсеткішті өткен жылмен салыстырғанда айтарлықтай айырмашылық жоқ. Алайда, вирустық инфекциялар балалар арасында белсенді таралып жатқаны рас.

Департамент өкілдері жағдайды қалыпты деңгей деп бағалап отыр. Олардың айтуынша, аурушаңдық динамикасы өткен эпидмаусымның дәл осы кезеңімен салыстырғанда айтарлықтай өзгермеген, сондықтан облыс бойынша қосымша шектеулер немесе карантиндік шаралар енгізілмеген. Бұл – қазіргі эпидемиологиялық ахуал бақылауда екенінің белгісі. Әр 100 мың тұрғынға шаққанда 6340,41 жағдай тіркеліп отыр.

Өңірде респираторлық инфекциялармен қатар, тұмау вирусы да тарала бастағаны байқалады. Лабораториялық зерттеулер нәтижесінде облыс бойынша A/H3N, яғни, Гонконг тұмауының 5 жағдайы расталған. Барлық дерек Өскемен қаласында тіркелді. Ауырғандардың төртеуі – 14 жасқа дейінгі балалар.

Бұл жағдайда бір жасқа дейінгі нәрестелер мен жүкті әйелдер арасында деректердің болмауы айтарлықтай маңызды. Сондай-ақ, вакцина алғандар арасында тұмау расталмаған. Мамандардың айтуынша, бұл – вакцинацияның тиімділігін көрсететін жанама көрсеткіштердің бірі.

Дүниежүзілік денсаулық сақтау ұйымы 2025–2026 жылдары A/H3N2, A/H1N1pdm09 және B (Victoria) тұмау штаммдарының белсенді айналымға түсуі мүмкін екенін алдын ала болжаған болатын. ШҚО зертханалық анализдері осы болжамның дұрыстығын айқындап отыр.

COVID-19 деңгейі – ең төменгі шекте

Пандемия кезеңіндегі үрейлі статистикалар биыл мүлде басқа көрініс көрсетуде. ШҚО-да маусым басынан бері COVID-19-дың бар болғаны 2 жағдайы тіркелген. Бұл – өткен жылмен салыстырғанда 7,7 есе төмен көрсеткіш. 

Вирустық спектр: қандай инфекциялар анықталуда

Өңірдегі зертханаларда 368 сынама талдаудан өткізіліп, олардың 93-інде түрлі респираторлық вирустар анықталған. Бұл – вирустар спектрі кеңейіп келе жатқанын және ЖРВИ-дің көптеген қоздырғыштары бір мезгілде белсенділігін арттырғанын білдіреді.

Талдау нәтижелері мынадай:

Риновирус — 63 жағдай

Аденовирус — 29 жағдай

Бокавирус — 1 жағдай

Риновирус – көбіне жеңіл суық тию түрінде өтетін кең таралған вирус. Аденовирус тыныс жолдарына ғана емес, көздің шырышты қабатына дейін әсер етуі мүмкін. Ал бокавирус сирек тіркелгенімен, көбіне балалар арасында кездеседі.

Тұмауға қарсы вакцинация қарқынды жүргізілуде

Облыста тұмаудың алдын алу жұмыстары жоспарлы түрде жалғасуда. Жергілікті бюджет есебінен жалпы құны 76,7 млн теңгені құрайтын «Гриппол плюс» вакцинасының 75 000 дозасы сатып алынды. Бұған қосымша, жұмыс берушілер мен жеке сектор 2 000 доза екпе алған.

Бүгінгі таңда 74 530 адам вакцина салдырған, бұл – өңір халқының 10%-дан астамы.

Оның ішінде:

72 519 адам – қауіп тобына жататындар (96,7%)

1 831 адам – жұмыс берушілер есебінен

180 адам – ақылы түрде екпе алғандар

Қауіп тобына ең алдымен жүкті әйелдер, медицина қызметкерлері, созылмалы ауруы бар адамдар, 60 жастан асқан азаматтар, сондай-ақ интернаттар мен балалар үйлеріндегі тәрбиеленушілер кіреді. Бұл топтарда ауру асқыну ықтималдығы жоғары болғандықтан, вакцинациялаудың маңызы да ерекше.

Мамандар сақтық шараларын күшейтуді ұсынады

ШҚО Санитариялық-эпидемиологиялық бақылау департаменті тұрғындарға маусымдық инфекциялардың алдын алу үшін бірқатар қарапайым, бірақ тиімді ұсыныстарды сақтауға кеңес береді:

тұмауға қарсы вакцина салдыру;

қол гигиенасын сақтау, антисептик қолдану;

адам көп жиналатын орындарда маска тағу;

үй-жайларды жиі желдету және ылғалды тазалау;

науқастармен жақын байланыстан аулақ болу;

иммунитетті нығайту үшін дұрыс тамақтану және салауатты өмір салты.

Департамент мамандары алдағы апталарда вирустық инфекциялар қарқыны әлі де өсуі мүмкін екенін жоққа шығармайды. Сондықтан халыққа профилактикалық шараларды ұмытпауға шақырады.