Аягөз  аудандық ауруханасының  тарихында алғашқы рет медицина ғылымдарының кандидаты, жоғары  категориялы  дәрігер, кардиохирург,  ангиохирург және интервенциялық  кардиолог-магистр - Тимур Өтеғалиев  оталар  жасады.

Жоғарғы дәрежелі дәрігер Тимур Өтеғалиев бұған дейін елорда мен Алматыда жұмыс істеген. Ширек ғасырлық тәжірибесі бар маман «Болашақ» бағдарламасымен Оңтүстік Кореяда білімін шыңдаған. Ал Аягөз аудандық ауруханасына келіп еңбек ете бастағанына екі ай ғана болды.

Шалғай ауылда жұмыс істеу туралы ұсынысқа бірден келіскен. Өйткені халыққа қызмет етуді өзіне абырой санайды.

– Науқасты апарып үлгере алмайды, сондықтан қасымызда тұрған ауылдардан әкеліп, Аягөздің өзінде дереу көмек көрсетіп жатыр. Бір жарым сағат үлгермесек, инфаркт ұлғая берсе, өлім көбейе береді. 100-ден астамын тексеріп, кеңес береміз. Шұғыл 40 адамның өмірін құтқарып қалдық. Мына аппаратта көп мүмкіндік бар, жүрекке операция жасауға болады, мидың тамырын тексеруге болады. Инсультты уақытында білеміз, оған да уақыт аз кетеді, оны да ешқайда апарып үлгере алмайсың. Мына аппаратпен бәрін жасауға болады, - дейді рентгенхирург, медицина ғылымдарының кандидаты Тимур Өтеғалиев

Мықты құрал-жабдықтар, озық технология, білікті мамандар. Орталықта осының бәрі бар. Ауыл тұрғындары бұрынғыдай сабылып, алысқа бармай-ақ жоғарғы дәрежелі медицина қызметін алып жатқандарына дән риза. 

– 8 ай бұрын Астанада операция жасатқанмын, енді одан кішкентай мазалай берді. Ол жаққа баруға алыстау болды. Енді мына жерден ашылғанына алғыс айтамыз. Зейнеткер адамдар алысқа жүре алмайды, әйтеуір ауырғаннан кейін осы жерге келіп едік, үлкен ем болды. Ақ халаттылардың бәріне рақмет айтамын! - дейді ауыл тұрғыны

Қабыланбек Дүйсенбаев.

Айта кету керек, орталық ауданаралық ауруханада ангиографиялық диагностикалық аппараты орнатылып, II деңгейдегі кардиологиялық орталық ашылғалы бері жақсы мамандар жұмыс істеп, адам жанының арашашысы болып отыр.