Өскеменде тағы 27 үйдің қасбеті жөнделеді
Облыс орталығында Назарбаев даңғылы мен Металлургтер көшесіндегі үйлердің қасбетін жөндеу жұмыстары жалғасуда.
Қазір жұмыстар Назарбаев даңғылы мен Потанин көшесінде жүргізілуде, деп хабарлайды Altaynews тілшісі.
Айта кету керек, бірінші кезеңде барлығы 21 үйдің қасбеті жаңартылатын болады. Алайда жұмыстар осымен аяқталмайды, яғни қасбеттерді жаңарту бағдарламасы бірнеше жылға созылып, кем дегенде 100 үй жөнделмек.
– Абаттандырудың екінші кезеңіне Назарбаев даңғылындағы "Металлург" саябағынан Коменданткаға дейінгі ғимараттарды, сондай-ақ "Дюймовочка" дүкенінің маңындағы үйлерді қамтитын 27 ғимараттың тізімі жасалды. Қазақстан көшесі мен Шәкәрім даңғылындағы ғимараттардың да қасбетін жөндеу жоспарда бар, – дейді Өскемен қаласының әкімі Жақсылық Омар.
Қазіргі күні қаладағы 2 тұрғын үйде жұмыстар толықтай аяқталған.
Естеріңізге сала кетейік, шаhар басшысы аталған жұмыстардың бірінші кезеңі шілде-тамыз айларында аяқталу керек екенін, содан кейін екінші кезеңге қаражат бөлетінін айтқан болатын.
Оқи отырыңыз
