Ел бойынша қылмыс деңгейі 17%-ға төмендеді. Бұл туралы Қазақстан Республикасының Бас прокуроры Берік Асылов мәлімдеді.

Бүгін 2023 жылдың бірінші жартыжылдығындағы жұмыс қорытындысы бойынша Бас прокуратура алқасының кеңейтілген отырысы өтті, деп хабарлайды Altaynews тілшісі Бас прокуратураның баспасөз қызметіне сілтеме жасап.

Отырыс барысында Берік Асылов өткен кезеңде ел бойынша қылмыс деңгейі 17%-ға (74650-ден 61442-ге дейін) төмендегенін айтты. Прокуратураның үйлестіруімен аймақтардағы қылмыстық жағдайға нақты әсер еткен 10 ұйымдасқан қылмыстық топтың жолы кесілді. Бірлескен шаралар нәтижесінде синтетикалық есірткі өндіретін 30 зертхана жойылған.

Сонымен қатар Бас прокурор отбасылық-тұрмыстық зорлық-зомбылықтың, балаларға қарсы жыныстық қылмыстардың, алаяқтық пен есірткі саудасының алдын алу бойынша жұмыстарды күшейту қажеттілігіне де тоқталды.

Қылмыстық процестің заңдылығын қадағалауды жүзеге асыру барысында прокурорлар 512 адамды негізсіз күдіктен қорғады. Үш буынды модель шеңберінде прокурорлар тергеу органдарының 150 мыңнан астам процестік шешімдерін зерделеп, оның ішінде 4,5 мың қаулыны келісуден бас тартылды. Соттарда 11 мың қылмыстық іс бойынша мемлекеттік айыптау қамтамасыз етілді. Прокурорлардың бастамасы бойынша 197 адамға қатысты үкімдер заңға сәйкес тексерілді, бұл ретте 156 сотталушының жағдайы түзетілді, оның ішінде 8 адам ақталды. Өз кезегінде прокурорлар 20 адамға қатысты қылмыстық жауаптылықтан босатуға жол бермеді және заңсыз ақтау үкімдерінің күшін жоюға қол жеткізді.

Бас Прокурор басым міндеттердің қатарында экономикалық ресурстардың заңсыз шоғырлануына қарсы іс-қимылды белгіледі.

Жақында Парламентпен қабылданған тиісті заң жобаларының топтамасын іске асыру шеңберінде активтерді қайтару жөніндегі жұмысты тиісті ұйымдастыруды қамтамасыз ету нұсқалды. Атап айтқанда, енгізілген өзгерістермен Бас прокуратура жанынан елден заңсыз шығарылған мүліктік және өзге де игіліктерді қайтару жөнінде жеке бейінді ведомство құру көзделген.

Бұл органға басқа мемлекеттердің соттарында, халықаралық арбитраждарда Қазақстанның мүдделерін білдіру, талап-арыз беру, шоттарға, мүлікке тыйым салу туралы өтінішхаттар енгізу және өзге де әрекеттерді жүзеге асыру өкілеттіктері беріледі.

Әлеуметтік-экономикалық салада бюджет қаражатын жұмсаудың заңдылығы, автожолдардың жай-күйі, ЖЭО жұмысы, жерді нысаналы пайдалану, қала құрылысы, азаматтардың осал санаттарын, оның ішінде балаларды, мүгедектігі бар адамдарды қорғау және т.б. мәселелер бойынша бірқатар тексерулер жүргізілді.

Қадағалау және ден қою актілері бойынша мемлекетке 10 млрд теңге өтелді, 37 млрд теңге сомасына мүлік, 400 мың гектар жер қайтарылды.

Түрлі жауапкершілікке 11 мың адам, оның ішінде әкімдіктер мен мемлекеттік органдардың қызметкерлері тартылды. Сотқа дейінгі 116 тергеп-тексеру басталды, 65 адам сотталды. 1,3 млрд теңгеден астам сомаға жалақы берешегі өндірілді («Таза талас» МКК, «Тараз Құрылыс Инвест» ЖШС, «КЭМОНТ» АҚ, «Казстройтрейд» ЖШС және т.б.).

Прокурорлардың қатысуымен бірқатар еңбек даулары шешімін тапты, оның ішінде Маңғыстау облысының «БерАли» ЖШС ұжымын жұмыс орындарымен қамтамасыз ету мәселесі де бар.

Сондай-ақ 23 мың кәмелетке толмағандардың конституциялық құқықтары қорғалды.

Алматы және Түркістан облыстарында 18 млн теңге сомасына мүгедектігі бар адамдарға салықтар мен мемлекеттік баждарды негізсіз салудың 4 мыңнан астам фактісі анықталды.

Тұрғын үйге кезекке 22 жетім және ата-анасының қамқорлығынсыз қалған балалар қойылды.

Бас Прокурор халықты толғандыратын мәселелерді шешуде алдын алу шараларын қабылдаудың маңыздылығын атап өтті. Олардың қатарында еңбек жанжалдары, тығыз салынған құрылыс, жерді ұтымды пайдалану, жайылым тапшылығы, сумен жабдықтау, коммуналдық мәселелер және т.б. бар.

Бизнесті қорғау бойынша жұмыс барысында мобильді топтармен кәсіпкерлердің құқықтарын бұзу туралы 1300-ден астам сигнал өңделді, әрбір бесінші факт расталды.

Бас прокуратураның бастамасы бойынша 5 министрліктің 9 бұйрығы жойылды, олар 2 мыңға жуық кәсіпкерді заңсыз тексеруді көздеген. 5,3 мың тыйым салу және шектеу шаралары, 560 млн теңгеден астам сомаға 2,3 мың әкімшілік айыппұл жойылды.

Отырыс қорытындысы бойынша барлық облыстардың прокурорларына елдегі заңдылықты нығайту, азаматтардың конституциялық құқықтарын, қоғам мен мемлекеттің мүдделерін қорғау жөнінде жан-жақты шаралар қабылдау тапсырылды.