Тұрақты және сенімді энергия көздеріне деген қажеттілік барған сайын айқын бола бастаған әлемде таза энергия көздері шешуші рөл атқарады. Соңғы он жыл ішінде Қазақстан бүкіл ел бойынша күн және жел электр станцияларын құра отырып, жаңартылатын энергия көздерін белсенді түрде енгізуде.

Атом энергетикасы – күн және жел энергиясымен бірге экологиялық таза энергия көздерінің бірі. Әлемдегі ең ірі уран қорларының біріне ие Қазақстан атом энергетикасы саласында жетекші орындарға ие болудың бірегей мүмкіндігіне ие. Күн немесе жел сияқты жаңартылатын энергия көздерінен айырмашылығы, атом электр станциялары ауа райына қарамастан тәулік бойы электр энергиясын өндіре алады.

Атом электр станцияларының басты артықшылықтарының бірі – олардың тұрақтылығы. Атом электр станциялары дәстүрлі көмір және газ электр станцияларымен салыстырғанда көмірқышқыл газының ең аз мөлшерін шығарады. Бұл парниктік газдар шығарындыларын айтарлықтай азайтуға және жаһандық климаттың өзгеруімен күресуге көмектеседі. Сонымен қатар атом энергиясын пайдалану табиғи ресурстарды сақтауға ықпал етеді, бұл орнықты дамуға және экологиялық жағдайды жақсартуға ұмтылатын Қазақстан үшін ерекше маңызды.

Атом электр станцияларын салу және пайдалану мыңдаған жұмыс орындарын ашады және аралас салалардың дамуын ынталандырады. Атом электр станциясының құрылысы – бұл құрылыс жұмысшыларынан бастап инженерлер мен дизайнерлерге дейінгі әртүрлі салалардағы көптеген мамандардың қатысуын талап ететін ауқымды жоба. Бұл құрылыс индустриясын, сәулет және инженерлік бюроларды, сондай-ақ құрылыс материалдарын өндірушілерді дамытуды ынталандырады. АЭС қызмет көрсету және пайдалану үшін жоғары білікті мамандар қажет. Бұл атом энергетикасы саласындағы инженерлер мен техниктерді даярлау бойынша жаңа білім беру бағдарламалары мен курстарын құруды талап етеді.

Алайда атом энергетикасының артықшылықтары аясында қоғамдық пікір қалыптастыратын тарихи мұра бар. Чернобыль апаты мен Семей полигонындағы ядролық сынақтар қазақстандықтардың санасында терең із қалдырды, бұл ядролық технологияларға деген қорқыныш пен сенімсіздік тудырды. Сондықтан АЭС қауіпсіздігі мен сенімділігі саласындағы заманауи жетістіктер туралы халықты ақпараттандыруға ерекше назар аудару қажет.  Технология дамып келеді және атом энергетикасы барған сайын қауіпсіз әрі тиімді болып, елімізге жаңа көкжиектер мен мүмкіндіктер ашады.

Әйгерім Шақаева,

Энергетика министрлігі ядролық физика институтының қызметкері