– Болжамды энергобаланс бойынша елімізде алдағы он жылда 18 ГВт қуаты бар станциялар салынуға тиіс. Әрине, жаңартылған энергия көздері де дамытылып жатыр. Осы бағытта 139 нысан жұмыс істейді, жаңа нысандар салу жағы да жоспарда бар. Көгілдір отын жағатын станса салу, көмір жағатын стансаларды жаңарту да жоспарға енгізілген. Алайда бұл стансаларды қаржыландыру қиын. Өйткені қоршаған ортаға көп зиян келеді. Сондықтан қоршаған ортаға әсері аз, тұрақты «жасыл» энергетика көзі – АЭС салу мәселесі қаралып жатыр. Дәл қазір төрт мемлекеттің: Оңтүстік Корея, Қытай, Ресей және Францияның технологиясы қарастырылып жатыр. Климаттық және геологиялық зерттеулер нәтижесі станса салынатын ең ыңғайлы орын – Алматы облысындағы Балқаш көлінің бойында орналасқан Үлкен ауылы екенін көрсетті. Алдағы уақытта дәл осы оңтүстік өңірлерде энергия тапшылығы туындайды деген болжам бар, – деді Энергетика министрлігінің өкілі.