Қазақстанда әскерге шақырылушыларды іріктеудің жаңаша тәсілі енгізіліп жатыр. Енді психоэмоционалдық тұрақсыздығы бар, суицидке бейім жастар әскерге алынбайды. Бұл туралы Қорғаныс министрлігі мәлімдеді, деп хабарлайды Altainews.kz тілшісі.

Арнайы әзірленген PSY-тәуекел әдістемесі көктемгі әскерге шақыру кезінде сынақтан өтіп, оң нәтиже көрсеткен. Соның арқасында 470-тен астам бозбалада суицидке бейімділік белгілері ерте анықталып, олар әскери қызметке жіберілмей, қосымша тексеруден өтті.

Жаңа тәсіл бірнеше кезеңнен тұрады: бастапқы скрининг, терең психологиялық зерттеу және қажет болса психиатриялық тексеріс. Яғни, жастың психологиялық тұрақтылығы толық зерделенеді.

Мәселе жуырда Ұлттық әскери-патриоттық орталықта өткен жиында да көтерілді. Жұмыс тобына Қорғаныс, Ішкі істер, Денсаулық сақтау, Ғылым және жоғары білім министрліктерінің, сондай-ақ арнайы қызметтердің мамандары қатысқан.

Арман Қалышевтың айтуынша, бастама Үкіметтің тапсырмасына сәйкес іске асырылып жатыр және болашақта бүкіл ел бойынша кезең-кезеңімен енгізіледі.

Мамандардың сөзінше, PSY-тәуекел әдісі әскерге іріктеуді анағұрлым сапалы етіп, жас сарбаздардың психологиялық саулығын сақтауда маңызды рөл атқармақ.