Елімізде халықаралық музыкалық реалити-шоу түсіріледі
Фото: kudaibergenov.dimash
Қыркүйек айында Қазақстанда Қытаймен бірлескен жаңа музыкалық реалити-шоудың түсірілімі басталады. Жобаның атқарушы продюсері – Димаш Құдайберген, деп хабарлайды Altainews.kz тілшісі.
Бұл туралы әнші Instagram парақшасында хабарлады. Оның айтуынша, шоу Hunan Broadcasting System компаниясымен бірлесіп жүзеге аспақ.
– Hunan Broadcasting System компаниясымен жаңа музыкалық реалити-шоуды бастау туралы келісімге қол қойдым. Бұл шоуда мен атқарушы продюсермін. Әр елден келген вокалистер өнер көрсетіп, Қазақстанның төрт өңірінде түсірілім өтеді. Осы арқылы туған жерімнің табиғаты мен мәдениеті әлемге таныстырылады, – деп жазды Димаш.
Жоба қыркүйектің 8-29 аралығында Түркістан, Алматы, Ақтау және Астана қалаларында түсіріледі. Шоу жүздеген миллион көрерменге ұсынылып, Қазақстанның әсем табиғаты мен мәдениетін паш етпек.
Айта кетейік, Димаштың Қытайдағы шығармашылық жолы он жыл бұрын Hunan TV арнасындағы «Singer» жобасынан басталған болатын. Енді ол сол арнаға халықаралық ауқымдағы музыкалық шоудың бастамашысы ретінде қайта оралып отыр.
Оқи отырыңыз
