Биылғы айт намазы Шығыс өңірі бойынша облыс, қала, аудан және ауыл мешіттерінде 28 маусым күні таңғы сағат 7.00-де оқылады.

ШҚО-ның бас имамы үндеу жариялап, жұртты айт мейрамымен құттықтады, деп хабарлайды Altaynews тілшісі.

Айта кетсек, облыс орталығы Өскеменде құрбан шалу орны қаланың іргесіндегі Шығыс ауылының жанында болады. Құрбан шалу айт намазынан кейін сағат 07.30-да басталады. Ал  мерекелік рухани-мәдени шаралар 28 маусым күні  «Халифа Алтай» мешітінің алдында өтеді.

Сондай-ақ Қазақстан мұсылмандар діни басқармасы жанынан құрылған «Уақып» және «Зекет» қорларының ұйымдастыруымен «Құрбан-2023» сайты жұмыс істеп тұрғанын еске саламыз. Осы сайт арқылы онлайн құрбан шалып, аз қамтылған отбасыларына көмектесе аласыздар.

Құрбан шалу орнын Өскемен қалалық ауыл шаруашылығы және санитариялық-эпидемиологиялық бақылау басқармасының мамандары қатаң бақылауға алып, сол жерде жұртпен бірге жұмыс істейді. Құрбан шалу барысында белгіленген талап-тәртіпті сақтап, тазалыққа мән берген жөн.

Құрбан шалуға қатысты өзге де сұрақтар болса, мешіт өкілдеріне хабарласып білуге болады.