Шығыс Қазақстан облысына жұмыс сапарымен келген ҚР Парламенті Мәжілісінің депутаты әрі «RESPUBLICA» партиясының тең төрағасы Руслан Берденов Риддер қаласына барды.

Елордадан арнайы келген өкіл «Шаңырақ» мектебінің мәселесіне назар аударды, деп хабарлайды Altaynews тілшісі.

Бүгінде 56 мыңнан астам халқы бар қаладағы жалғыз қазақ мектебі өзіне тиесілі құрылыс нысанын ала алмай жүр. Құрылыс нысаны деп отырғанымыз - 2022 жылы пайдаға берілген 600 орындық жаңа мектеп. Жаңа ғимарат ойламаған жерден аралас мектеп болып ашылған.

Ал Риддердегі 1200-ден астам қазақ баласының  550-ге жуығы екі корпустан тұратын ескі мектепте білім алуға мәжбүр. Мән-жайды ескі мектептің алдына жиналған ата-аналар Парламент Мәжілісінің депутатына баяндап берді.

Тұрғындардың арыз-шағымына құлақ түрген Руслан Берденов бұл мәселемен алдағы уақытта тікелей айналысатынын айтты.