Қарт Алтайдың асқақтығын қаламымен әйгілеп кеткен сөз зергері Оралхан Бөкейдің туғанына биыл 80 жыл толып отыр. Жарты ғасыр ғұмырында жасындай жарқ еткен жазушы көркем туындыларымен көпшіліктің көңіл пернесін дөп басып, жүрегінен орын алды. Бүгін жазушының 80 жылдығын жұрт болып дүркіретіп тойлап жатқандығы – соның бір дәлелі. 

Халық таң ата Катонқарағай ауданының орталық алаңындағы Оралхан Бөкей ескерткішінің алдына жиналып, тағзым етті, деп хабарлайды Altaynews тілшісі.

Біз бұл жолы қаламгер туған қарт Алтайдың бауырында өткен тойды тамашалап қайттық. Оралхан Бөкейдің 80 жылдығына арналған іс-шаралар облыс орталығында осыған дейін басталып кеткен болатын. Ал Алматы мен Астана сияқты ірі мегаполистерде алдағы туған күні қарсаңында үлкен іс-шаралар өтпек. Сондықтан да туған жерінде жазушының тойы ертерек тойлануда. Қаламгер рухына тағзым жасауға ниетті жұрт таң ата Катонқарағай ауданының орталық алаңындағы Оралхан Бөкей ескерткішінің алдына жиналды. Жазушының жерлестері, зиялы қауым өкілдері, қаламгерлер және билік өкілдері торқалы тойдың ашылу салтанатына қатысып, қаламгер ескерткішінің алдына гүл шоғын қойып, тағзым жасады.

Қызырбек Дүргінбайұлы